熱門:

2018年11月7日

陳心遙 視線所及

盧冠廷

好多香港人都係懷念八十年代所謂星光熠熠嘅樂壇:好多天王巨星、好多人癡迷偶像、業內搵到好多錢;對我嚟講,八十年代嘅好係有湧現好多有自己風格嘅樂隊,同埋為數不少嘅Singer-songwriters。當中盧冠廷係我最愛之一。

太多人所共知嘅好歌:《但願人長久》、 《一生所愛》、《陪着你走》;仲有我偏愛《漆黑將不再面對》、《世事何曾是絕對》等等。早十幾年前成個華語樂壇都興R&B,個個都走去唱。但真係把聲同內涵都唱得好嘅人屈指可數,香港入面盧冠廷就係其中之一。呢啲來自歐美嘅樂風係要曾經浸淫過喺嗰個環境入面先會入血。好多一講香港原創嘅Blues歌曲就會諗起林子祥嘅《這一個夜》,其實盧冠廷嘅《十四噸空虛》仲要比《這一個夜》早一年誕生,兩位大師先可以唱出藍調該有嘅寂寞同豪邁。

去到盧冠廷唱同作都咁勁嘅人,七十年代尾都要以唱酒廊為口奔馳,即係Raidas《別人的歌》嗰種感受;佢都經歷過。令佢出現轉變嘅就係粵語歌,佢太太唐書琛為佢嘅曲譜上廣東歌詞再交畀唱片公司,喺八十年代初發行咗第一張唱片《天鳥》,嗰陣人人都琅琅識唱嗰句「A-ha,我要飛往天上,A-ha,像那天鳥翱翔」。佢嘅絕世嘅才華畀香港人發現同認識。

盧冠廷亦係眾所周知嘅環保先鋒,真係知行合一,實踐綠色嘅生活。佢有一段時間用自己嘅影響力同知名度去宣傳環保概念。演藝圈入面,有理念而身體力行去推廣嘅,又能有幾人?

唔講唔知,原來盧冠廷天生有讀寫障礙,腦同手唔協調,好難記歌詞。佢喺一次訪問中提過佢喺美國讀中學嘅時候自卑同唔開心,覺得老師都嫌棄佢。不過就有一個課堂,一位黑人嘅老師要佢寫詩,但盧冠廷就想唱出嚟。嗰位黑人老師話:「點解唔得?」於是盧冠廷就譜上旋律唱詩,獲得全班鼓掌,自此令佢重拾自信。呢方面有障礙,另一方面就係天才,香港人就算都明白個道理,又幾時先肯認真看待同畀機會人哋呢?

到底係有香港呢個環境孕育出有才華嘅人,定係有才華嘅人喺香港逆境面世,恐怕係一個雞先同蛋先嘅問題。奇怪嘅係呢半個世紀,喺呢片土地生成嘅優秀文化,香港人從來冇好系統咁傳承畀下一代。以音樂為例,而家大家爭相仿效嘅,都係外國潮興嘅音樂,其實絕佳嘅養分都已經喺度,要鑽研都大把嘢學啦。

最後祝賀今年「CASH音樂成就大獎」嘅得主盧冠廷先生,為香港樂壇再造更多經典。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads