2018年10月3日
香港教育其實都幾成功;如果成功等於將一啲諗法印喺學生個腦入面。
講真,我覺得而家嘅學生比起我哋叻太多。小小年紀就十八般武藝,讀嘅課程要比我哋艱深。我見過一個6歲小朋友玩緊個「看圖學英文」嘅App,嗰啲單字我都唔係全部識。好多小朋友連母語都未講好,就學緊中學大學嘅英文、數學,或者連大人都唔理解嘅時事「常識」。
好多做咗家長嘅朋友都唔係唔明:「揠苗助長」對子女一啲好處都冇。但大家都話:個個都係咁做嘅時候,如果你唔係咁做,子女就會連一間好啲嘅小學都入唔到,入唔到一間好啲嘅小學就入唔到一間好啲嘅中學⋯⋯餘此類推⋯⋯咁就一世㗎喇。
當學業成績等於一個小孩子一生前途,而由校長、教師,到家長到小孩子都默認呢個原則之後;操控學校讀啲咩嘢、點畀分嘅人無形中擁有至尊無上嘅權威;然後出糧畀呢啲人嘅人就堪稱係上帝喇。
中學時候會偷偷走堂,梗係唔啱啦;代價係錯失咗好多應該學好嘅知識。但唔走堂都唔代表會聽書;只係被動地服從一啲畢業嘅要求之嘛。
到咗大學,冇人會點名,反而唔會成日走堂,尤其係自己選修嘅學科。興趣所至,交咗學費,走堂反而係蝕底。
至少,我覺得讀中學同讀大學應該有啲唔同,唔理個課程係咩級別。真實嘅世界,除非係醫護法律工程呢啲專科,佔咗大半嘅工作其實都同學歷無關,但同知識、能力有關。上晒堂畢晒業都唔代表有知識、能力,咁走唔走堂又有咩關係?所以當遲大到、或瞓咗大半堂嘅同學,好緊張咁埋嚟追問我點咗名未,我都覺得十分之無奈。
以前個法則係咪真係追唔上時代,所以要淘汰呢?大學還大學、理工還理工,唔想返學讀書就跟師父做學徒,邊做邊學,一樣係搵到食而值得尊敬。問題只係以前香港一早被灌輸咗:「入大學係天之驕子」、「工字不出頭」嘅想法,搞到個個追大學之名而不求大學之實。今時今日,將成個學徒制搬咗入院校入面,好似用「學歷」去斷定學生有冇「資格」就業,又合乎社會嘅真實嗎?
一街都係車,一天都係飛機,一地都係光纖;早早認清呢個事實,即使無力抗議,都可以審時度勢,及早發現下個世代真正應該學嘅技能同知識,唔會再花時間去學永遠唔會用嘅生字,同埋去記上網撳兩撳就知道嘅偏僻冷知識喇。
最後,2+2=4。如果要計錯先可以畢業,記得教佢哋畢業之後都要記得番個正確答案啦。
訂戶登入