熱門:

2018年4月4日

陳心遙 視線所及

兒童節隨筆

世界各地都有屬於自己嘅兒童節;比較多地方係定喺6月1號或者11月20號。6月1係國際婦女聯合會定嘅,11月20就係聯合國教科文組織嘅,全世界只有香港同台灣係定喺4月4號,此乃中華民國時期開始嘅習俗,源於1931年,由當時民國政府嘅行政院長,孔子後人孔祥熙主理嘅「中華慈幼協濟會」提議,開始定下4月4號為兒童節,但台灣地區係要直到1991年嘅時候,先將呢日同婦女節合併為同一個節日,放假一天,並且定名為「婦幼節」。所以4月4號名副其實係兒童節,大概只係香港。

冇人否認兒童係未來,最老生常談嘅講法就係:「孩子係我哋社會未來嘅棟樑」。但諗深一層,點解會咁講呢?所以先排同一隊新嘅細路仔組合Idol Jr.寫咗一首歌,叫Imagine,歌詞大意係講,細路仔會想像自己同個世界嘅未來會變成點;我哋而家有嘅海洋、森林、清新嘅空氣又會變成點?佢哋呢刻天真嘅心靈又會變成點。當我哋話「孩子係我哋社會未來嘅棟樑」嘅時候,有時會有一種事不關己嘅無奈——孩子係未來嘅棟樑,咁我哋呢?我哋唔係應該就係「現在社會嘅棟樑」嚟咩?我哋嘅社區、我哋嘅學校、我哋嘅制度、我哋嘅地球,唔係通通喺我哋手上咩?如果我哋對於現在嘅困境無從入手,老鼠拉龜,點解會期待未來嘅主人翁會帶來突破轉好嘅改變呢?

「垂頭在想像,明天的模樣,誰來做榜樣,紙船隨風向。望社區、望故鄉、望每天電視報章,望你行為,做我模擬的方向。」

小朋友咪又係睇我哋頭,我哋而家最關心咩嘢,佢哋就會學到乜嘢。望吓我哋個社會,你每日褒貶緊啲咩事,賞罰緊咩人,咪知道社會關心同認同嘅取向囉,而家社會邊個最大聲,最多人關注啲嘢,嗰啲咪係小朋友對世界嘅認知囉。你企出嚟關心樓價升跌又好,香港嘅平原森林畀火燒又好,小朋友知道嗰樣嘢重要囉。

「有沒有望真我?有為我着想過?不清楚應否信任所有大人嗎?天真的心靈,明日又會變什麼,願你可,坦誠來答我。明天將變哪樣,我依靠想像,可否靠你,去重拾理想。」有朋友睇完我呢幾句第一個反應就係「黐線咩,梗係唔好相信大人啦」。我想話,無論你想唔想,小朋友第一個會相信嘅,就係身邊嘅大人,所以你想小朋友將來係點,心靈會變成點,讀幾多個興趣班都未係最重要,先諗下我哋而家留低一個咩世界畀佢哋啦。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads