熱門:

2018年3月7日

陳心遙 視線所及

三八國際婦女節

同所有節日嘅宿命一樣,今日嘅三八婦女節都變成某啲商人促銷嘅好日子,尤其係商界盛行嘅講法係:女人嘅錢特別好賺。不過國際婦女節原本嘅起源非常之政治,而家唔係咁多人會提起。

喺1910年,成一百年前,德國婦運領袖Clara Zetkin喺丹麥哥本哈根召開一個國際婦女大會,有來自17個國家嘅婦女界代表,會議上一致通過:女人有權參與議會選舉,並且建議每年要有一日係代表婦女爭取權利嘅節日。至於點解係3月8日,因為世界上有多個標誌性嘅婦女示威,都係3月8日舉行。1857年3月8日,美國紐約製衣廠同紡織廠嘅女工上街抗議惡劣嘅工作環境同低微嘅人工;1908年3月8日,有成千上萬嘅紐約婦女上街,要求改善工作待遇同有選舉權。之後嘅1917年3月8日,俄國彼得堡有女工罷工,口號係:麵包、和平同自由,引起全市工人罷工,最後成功推翻沙皇,臨時政府宣布女人有選舉權。今日全世界即使係相對政治保守嘅國家,都會視婦女有選舉權係天經地義,其實係一百年前好多人前仆後繼抗爭而得番嚟嘅。

中國開始慶祝婦女節,都有非常之悠久嘅歷史,1924年,國民黨內嘅婦女部喺廣州召開嘅國民黨大會,就主張「婦女喺法律上、經濟上、教育上一律平等」,1949年後中華人民共和國成立亦有再次確認「三八婦女節」嘅精神。

時至今日,即使你隱隱約約了解三八婦女節嘅精神所在,亦未必為意呢場屬於全球嘅婦女平權革命其實尚未成功,而且婦女喺經濟上、文化上嘅歧視,會被簡化成資本主義嘅供求結果,或者係種族宗教嘅文化差異。舉個例子,而家我哋嘅時裝,製造商已經由早幾年嘅發展中國家,轉移到更窮困嘅國家度生產,而生產嘅主力,仍然係低下階層嘅婦女,甚至係未成年嘅兒童,佢哋工作環境同埋報酬,遠比我哋想像嘅惡劣,例如2013年孟加拉大樓冧樓事件,死傷者好多都係喺大樓入面,僭建工廠返工嘅婦女同兒童。講到尾,婦女權益同社會主義運動,爭取麵包、和平同自由,其實仍然係密不可分。

今日,再冇人明目張膽喺待遇上歧視女性,甚至有好多人反而覺得社會上有逆向歧視存在,譏諷爭取女權嘅係婦權X、左膠等等。即使真係有好小部分嘅婦權訴求係偏激唔合理,我哋都不能否認,日常生活中,女性因為性別角色、刻板形象而受到不同程度嘅騷擾同壓力,男人有時真係未必感受得到。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads