熱門:

2018年1月17日

陳心遙 視線所及

藍天白雲

喺香港電影資金最充裕嘅八十年代尾至九十年代,出現過一系列奇案電影,蔚為奇觀,同賭片一樣成為咗港產片獨具一格嘅類型。印象深刻嘅有描寫「雨夜屠夫」嘅《羔羊醫生》、八仙飯店滅門案嘅《八仙飯店之人肉叉燒包》、《屯門色魔》、《溶屍奇案》、《紙盒藏屍》等等。有睇過呢系列電影嘅朋友都知,部分嘅故事其實唔係冇描寫人性,關懷社會嘅意義內容,但係聽戲名都知,宣傳上就清一色用「三級嘅暴力色情血腥」做賣點。好多滄海遺珠,就算編導攝影美術出色,時下或者都會被視為獵奇商業片,被人遺忘,可惜。

好事係呢幾年終於有番以現實案件為藍本嘅港產片出現,早前有《踏血尋梅》,最近有《藍天白雲》。以《藍天白雲》為例,電影以一單發生喺美國、轟動一時嘅案件做基礎:一名移民咗去美國嘅香港少女,夾埋佢嘅男友,殺害咗自己雙親。而《藍天白雲》就將案件放喺香港新界度發生。

一個有先天心臟病嘅女仔,喺家庭同學校都飽受痛苦,最後將憤怒指向一直為佢製造不幸嘅父母身上。不過唔同嘅係,《踏血尋梅》同《藍天白雲》都冇晒以前嗰種嘅獵奇味道,暴力色情欠奉,取而代之嘅係更深入嘅人物描畫同攝影美感。

電影係透過香港電影發展基金嘅「首部劇情片資助計劃」嘅注資下拍攝。製作費唔多,但成果就比得上好多高成本嘅電影。張經緯導演技法純熟,無論係鏡頭、情緒都設計精準,點到即止。節奏相對緩慢但係就驚心動魄,一層層剝下一個貌似平凡嘅少女Connie嘅外表,發掘佢心底嘅暗黑宇宙;對比負責調查嘅探員Angela,對父親又憐又恨嘅情緒。表面上只有殘暴嘅兇手先配得起「擁有」嘅陰暗,其實可以埋伏喺任何一個普通人身上。啱啱憑《空手道》奪得「香港電影評論大獎最佳女演員」嘅鄧麗欣,喺《藍天白雲》嘅演出更加沉實內斂,係另一個層次嘅精采演繹。新人梁雍婷同顧定軒再次證明,香港唔係冇出色嘅年輕演員,而係香港電影唔夠俾年輕演員發揮嘅機會;特別係梁雍婷,喺導演嘅技法之下,演出充滿攝人嘅力量。資深陳哲民同寶珮如,質樸淡定,真實如百姓走入鏡頭,令特殊嘅劇情更具說服力。

戲入面多個雲端嘅空鏡乍明乍暗,人心無常就如陰暗不定嘅天色。明明戲名叫《藍天白雲》,字款設計如小學生天真開朗嘅畫法,但正正係咁嘅氛圍之下,睇完先覺得震撼,心情悸動不已。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads