IPO冰河期券商搵食法

各位「巴打」，香港棟篤笑始祖黃子華的金句多不勝數，在1999年《拾下拾下拾年棟篤笑》中的一句「搵食啫，犯法呀」，至今仍然廣受本港市民所借用，絕對是經典之中的經典。「高仁指點」話你知，本港IPO（首次公開招股）市場進入冰河時期，券商為了搵食無所不用其極，想出了「做世界」的方法。

沈繼司：一踏入6月，唔少公司財政年度中期成績結算，我哋做「會計仔」嘅又會有排忙了！

程更計：講到半年結，我就反而諗返起舊年上半年，全球股票市場投資氣氛比較差，本港IPO市場進入冰河時期，新股上市數目及集資金額「雙降」，我哋做經紀靠佣金搵食嘅，真係苦過Dee Dee。

向近年掛牌公司打主意

高　仁：何止經紀慘，券商更加慘，IPO冇生意，可能損失數以千萬計，仲要養住一班Corp Fin（企業融資）嘅人。

沈繼司：Corp Fin不嬲都係要主動出擊搵生意，券商有冇試過用其他方法搵錢呀？

程更計：佢哋咪轉向近3、4年上市嘅公司打主意，皆因佢哋對呢一批公司嘅情況比較熟悉，打算做佢哋世界囉！

高　仁：搵食啫，犯法呀！Just kidding！沈兄，你係咪有嘢想問？

沈繼司：上市公司有好亦有壞，佢哋究竟會點樣做？

程更計：冇錯。呢一批上市公司可以分為兩類，第一類是公司業務發展得唔錯，而基本因素亦較好；第二類是公司業務做得較差，老闆財務狀況可能有問題。

沽貨壓股價測試老闆財力

沈繼司：哦！如果券商之前係有份幫公司搞IPO上市，對於老闆背景及實力可能瞭如指掌，應該知道老闆到底有冇錢接貨。

高　仁：照咁講，券商相信會嘗試沽一手貨，把公司股價打落嚟，睇睇有冇人跟進。

程更計：如果老闆有錢有實力，佢咪會接貨頂住沽壓，把股價推返上去，券商高賣低買，就可以賺一浸錢；另外，如果公司基本因素好，市場對股票有需求，股價都會自然反彈，券商一樣可以賺錢。

沈繼司：若果公司業務唔得，基本因素又唔好，係咪可以整死公司？

高　仁：其實，公司IPO一般都會有市值管理，老闆與投資者可能暗地裏有agreement，或者會借錢畀投資者買貨。若果券商知道補倉價位，沽一手貨推低股價觸發斬倉，螺旋效應（Spiral Effect）引起恐慌，借力打力斬倉盤愈斬愈低，沽幾千萬股隨時變到幾億股，公司股價被打殘，券商高賣低買，不排除可以賺幾十球。

程更計：若果老闆冇實力，但公司基本因素好，業務deliver到目標，業績又交到數，市場對股票有demand，相信股價都會反彈，券商同樣可以執到錢。

高　仁：冇辦法啦！世界難撈，券商要出盡法寶。

沈繼司：（突然說話變得文質彬彬）原來如此，與君一席飯，我又長知識了。

世界難撈系列．之一

本欄逢周一刊出

歡迎交流上市公司的財技個案及招數，請電郵至[email protected]。