熱門:

2018年8月6日

高仁 財圈識真假

猶太沽空基金蠱惑偷跳

高仁在小時候看過一齣西片叫做《大白鯊》(JAWS),其恐怖之處並不是牠的外表,而是牠永遠是神出鬼沒,令到觀眾們一直感到心驚膽戰。其實,鯊魚的初次攻擊純粹隨機而行,之後才會開始鎖定特定目標攻擊。「高仁指點」話你知,最近本港金融圈有猶太沽空基金肆虐,其大中華區CEO「鯊魚」鎖定目標之後,竟然有意想不到的蠱惑偷跳行動。

在披露對話實錄之前,請各位「巴打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東。

程更計──本地證券行經紀兼財務顧問,除了招呼散戶之外,亦向上市公司出謀獻計。

「余生」──猶太沽空基金大中華區CEO,專門從事另類貸款公司生意。

高 仁: 戴Sir,你今日仲乜「樹」(事)?食飯果陣飲咁多酒嘅?

戴孤劃: (酒後吐真言,普通話回答)最近聽了一些大股東押股融資被騙的個案,我心裏有一點不舒服、不爽耶,擔心下一個可能是……

程更計: 唔使擔心,我帶咗一個新朋友畀你哋認識, 等大家冇咁易中伏,佢個名叫做「余生」。

高 仁: 「余生」!?Sashimi(魚生)!?

「余生」: Hello!Nice to meet you mates!其實,我係一家猶太沽空基金嘅大中華區CEO,我哋專門從事另類貸款嘅生意。我係美籍華人N代嘅後裔,名字叫做Shark Yu,一般人稱呼我做「余生」,亦有「鯊魚」嘅外號。

平息招引公司大股東

程更計: 我知道,市場對你呢類貸款公司嘅需求好大,一啲比較「水緊」嘅三、四線上市公司主要股東要抵押股票融資,一般都好難喺我哋呢啲正規持牌證券行做得到,主要係我哋LTV(Loan-to-Value,貸款對價值)ratio低兼孖展利息高。

「余生」: 一般嚟講,我哋公司對於三四線上市公司股票嘅孖展貸款都「好筍」,LTV都可以做到五至六成,甚至七成;孖展利率特低,一般大概5至6厘息,最低4厘半都做過,違約息率介乎15至20厘【表】。

高 仁: 哈哈!「余生」呢盤生意果然人如其名,營運模式就好似「鯊魚」一樣,以高LTV兼平息作招徠,等啲「魚」(上市公司大股東)自動游埋去,之後先至鎖定特定目標(莫財嘅大股東)等開餐。

質低股價 揸乾貨源

戴孤劃: 高兄,你這樣說就不對呢!余兄,這個真是莫財上市公司大股東的佳音啊!那麼股東們都會很爽快地與你們簽訂協議,然後交出股票換取抵押融資貸款吧!

程更計: 其實,呢個先至係大股東嘅噩夢開始,因為「鯊魚」可以進行蠱惑「偷跳」行動。

「余生」: 冇錯。我哋係專吼一啲財政實力較弱嘅大股東,當呢啲大股東抵押股票融資之後,我哋就會「偷跳」偷偷地沽出部分股票推低股價,之後會要求主要股東top-up(補倉)。

高 仁: 由於大股東「缺水」嘅關係,只可以補貨(股票)畀「鯊魚」,佢哋會得到更多貨源去質低股價,直至揸乾主要股東手頭上嘅貨為止。大股東發覺出事已經太遲,可能泥足深陷。

戴孤劃: (高聲用普通話提問)高兄,既然大股東已經補倉,為什麼還可以在沽貨?這是怎樣辦得到呢?

高 仁: 大家講咗咁耐都有啲攰,不如我哋唞一唞、飲啖茶、食個包,一陣再慢慢傾啦。

(飯局未完,下周待續)

本欄逢周一刊出

如想與高仁交流上市公司的財技個案及招數,請電郵至 [email protected]

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads