發難不成發爛渣

牛年真係牛脾氣作祟，歐聯十六強一開鑼，球王級球員就輪流發爛渣，巴塞嘅美斯輸波黑面，贏波嘅巴黎聖日耳門球星基利安麥巴比恐嚇要當街殺死佐迪艾巴！真係睇場波都唔得安心，疫情啊疫情，幾時先肯消失呢？

周三輪到祖雲達斯球王C朗發難不成變發爛渣，作客波圖諗住衣錦還鄉嘞啩！點不知頭頭碰着黑，結果球隊爆冷以1比2落敗，可以講喺江東父老面前失曬威，難怪賽後同波圖球員握手嗰陣，都嘴藐藐、眼睥睥啦！

咁又係啊！波圖今場波守得好，將祖記嘅進攻逐一化解，C朗全場殺上殺落，徒勞無功當然燥火，結果愈火愈唔順。好似下半場佢禁區內心口控定，起右腳抽射竟然射空氣，成個人跌咗落地，就簡直係五十年一遇嘅場面啦！

諸事不順

未完㗎！又有次左路引球突襲，隊友阿歷士辛度竟然成碌木擋住，C朗成個人撞埋去跌低，對手唔該冇聲搶走個波，自己友居然幫對方防守，呢啲奇景簡直係百年一遇啦！讀者們換轉係球王C朗，都會當堂發爛渣啦！

仲未完啊！完場前，C朗跳起迎高波，右腳連控帶扣，一氣呵成扭過對方後衞，對手反應唔切成個撞跌C朗，球證先生竟然冇判到十二碼！祖記球員圍住西班牙球證迪施路投訴，最後當然係你有你吵，佢有佢吹雞完場啦！

達聞西諗起之前西班牙球證干沙利斯嘅陰謀論，佢話九成西甲球證係皇馬支持者，咁迪施路來自馬德里，九成九係皇馬粉絲啦！一來C朗係皇馬叛將，二來祖記係歐聯勁敵，希望迪施路執法冇偏私！

不過，波圖今場波係部署得宜嘅，贏祖記絕對係合情合理，不過次回合作客祖記唔易頂，對手只要贏1比0就夠晉級八強。祖記教練派路同C朗嘅緊張關係，反而更加值得球迷們擔心，一個係名宿、一個係球王，容乜易火星撞地球啫？

派路都係性格大叔，上周被問到C朗被換出唔happy，佢直腸直肚話：「好出奇啊？合約寫到明唔准換走㗎？」哈哈！講嘢咁鬼掘，乜派路你屬牛㗎？

下一篇：	遙遙領先
上一篇：	生酮飲食法的好處（三）

文章：