生兒當如林書豪

三國梟雄曹操講過：「生兒當如孫仲謀」，孫權係紫髯碧眼，唔通曹孟德想生個混血兒？非也！非也！孫權伯爺孫堅同阿哥孫策先後中伏身亡，佢18歲帶領東吳立足於亂世，真係好唔簡單。

咁又關林書豪咩事啊？關！兩岸三地係咪處於大時代啊？林書豪生於美國嘅台灣移民家庭，以華人身份打入NBA，2019年再進軍CBA加盟北京首鋼，贏盡內地球迷嘅掌聲後，近日竟然選擇入台灣籍，呢啲仲唔係孫仲謀嘅級數？

叻過林志玲

試問，有邊個名人可以好似林書豪咁食盡中美台三家茶禮？林志玲、成龍、蒼井空通通冇得fight，真不愧係哈佛尖子。台灣行家覺得林書豪咁做，係想將來代表台灣隊，達聞西只可以講呢類評論，同「小馬哥」馬英九一樣天真。

查實內地舊年11月推出對台《26條措施》，讓台灣人享有內地人同等待遇，如果林書豪入籍變台灣人，身份就變成本土球員，球隊就會多一個外援名額，畀緊300萬美元年薪嘅北京首鋼，仲唔攬住林書豪嚟錫啊！

講真，又抵林書豪喺內地吃得開，新冠疫情期間捐咗1000萬人仔，比好多本地明星更闊綽。不過唔知係咪咁得罪本地人，季後賽屢遭暴力犯規，佢最多都係喺微博開下玩笑：「CBA係咪打少林籃球？」呢啲咪內地搵食應有嘅態度囉！

後來季後賽四強不敵廣東宏遠隊，呢位好脾氣球星都當場起火，皆因對手插眼、打鼻、拍耳仔，聽講一度聽唔到嘢！雖然領教過少林籃球，林書豪約滿番美國，都叫網編寫下感人字句：「分別時我們會講拜拜，但我這次寧願講再見！」

究竟，林書豪會唔會番CBA呢？達聞西覺得可能性好大，雖然近日有傳佢去勇士隊試訓，但呢位31歲老將好難爭到NBA合約；CBA球員係就係茅柴啲，不過勝在薪高糧準嘛，佢自己都講過唔知幾時開始，自己嘅波鞋會好快賣得晒！

既然內地球迷咁厚愛，林書豪點會好似徐志摩咁，「輕輕地我走了，不帶走一片雲彩」？內地潛規則係「愛國是工作，赴美是生活」，林書豪做埋台灣人，民族情操高過幾多人啦！曹操再世嘅話都會改口：生兒當如林書豪！

下一篇：	波歷克割良性腫瘤
上一篇：	運動營養補充－－綠茶提取物（上）

文章：