《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年4月8日
後生仔血氣方剛，好多言行可能過火，但唔代表所講所做嘅嘢唔啱，不過若果乜太乜叔都發火，仲鬧話要替某人嘅智商着急嘅話，而某人仲走去加自己人工，達聞西只可以話：呢個人，已經無可救藥！
近日球壇興起球員減薪風暴，連59歲嘅球王「老馬」馬勒當拿都有火，「我知有啲球員有錢到唔使出人工，但好多球員一個月人工都不能少！球會應該如數畀錢，我知道好多球會一塌糊塗，希望借疫情嚟走數！」
老馬目前擔任阿甲弱旅甘拿斯亞教練，佢批評球會多年來當球員係奴隸，「有啲球隊好似年年有新冠疫情咁，唔好搵藉口啦！球員都要食飯！」呢位球王唔係得把口，仲成立基金幫助受影響嘅教練同球員。
邊個冇後生過呢？好多上咗位嘅成日吹噓自己本事，跟住就鬧年輕一代唔掂，老馬就最誠實：「之前賺到錢嘅球員好幸運，教練們都要幫下年輕球員，呢個時候佢哋需要幫助，我哋要義無反顧伸出援手！」
達聞西上個禮拜，聽講有英超球會高層提議，將餘下聯賽搬去中國舉行，貪嗰度疫情已經受控咁話！真係替呢班人嘅智商擔心，就算係講笑都係一個爛gag，呢班最高層人工未減，居然將刀斬向球員？
意大利球員工會主席、前意大利國腳湯馬斯，都為班後輩球員抱打不平，「意甲聯賽球會決定若果球季完成唔到，所有球員減薪三分一。簡直係發神經！呢班球會班主之前仲逼職球員繼續操練！」呢位爆炸頭名宿講。
意球員反對降薪
正如打比郡球員兼助教朗尼話齋，減薪係唔可以一刀切，唔同層次球員嘅收入唔同，「好多年輕球員仲住公屋，靠周薪2000鎊交燈油火蠟，仲要養埋一家大細！你話cut 30%嘅啫，但已經係600鎊，你話影響大唔大嘞！」
咁又係啊！英超球星周薪十幾二十萬，減三成都係一架車仔嘅價錢，最多咪換遲一個月車囉！於是咪出現曼城球星基爾獲加喺隔離令下，搵兩個妓女上門扮「盈盈同樂樂」，呢班人活喺另一空間㗎。
講真啊！疫情底下好似立立亂，其實只要有少少同理心，就可以處理到紛爭，一啲都唔關智商事，咪詐儍扮懵啦！
放大圖片 / 顯示原圖
訂戶登入
