大「蠱」東炮製暗黑「鷓鴣批」

各位「巴打」都知道，金融市場出蠱惑沒有界限之分，大股東可以施展不少蠱惑招數，例如大「蠱」東（蠱惑的大股東是也）的「鷓鴣批」財技。「高仁指點」話你知，誠如「地獄廚神」會煮出最難食的暗黑料理，大「蠱」東也能炮製暗黑版的「鷓鴣批」財技。

戴孤劃：（用普「東」話，即普通話＋廣東話）高仁，你說「空軍」想借貨沽空隻股票，大「蠱」東反而會感到開心。幹嗎？他是儍B嗎？

高　仁：哈哈！呢個大「蠱」東只不過係諗到，可以用更狠一啲嘅暗黑版「鷓鴣批」（借、沽、批），即係涉及借貨、沽貨、供股嘅3種手段，或許可以狠狠地大賺一筆啫。

借貨予空軍從中賺高息

程更計：按照高仁所講，借貨應該係大「蠱」東借出股票畀「空軍」，從中可以收取借貨嘅高利息；而沽貨就係交由「空軍」去代勞，佢哋會將公司股價壓下來，大「蠱」東完全唔使郁手，大「蠱」東真係多謝晒佢哋！

戴孤劃：如果「空軍」力度不夠，怎麼辦？

程更計：咁仲好，大「蠱」東可以幫手沽埋一份，自己先沽返一轉套現。

高　仁：當股價被質咗落嚟之後，大「蠱」東嘅公司可以在低位宣布供股，又或者批股給友好人士，咪又係相當於高賣低買。大「蠱」東借貨可賺取高息，還可以節省交易費用，何樂而不為？

戴孤劃：嘩！這也太狠了吧。

公開發售借機挾空倉

程更計：戴Sir，供股都未算狠！如果大「蠱」東再狠一啲，而且本身又夠疊水，可以來一過「鷓鴣『公』」。「公」唔係講緊男性嘅公，而係公開發售嘅公，公司要進行更絕嘅公開發售，肯定嚇到「空軍」雞飛狗走。

高　仁：不論批股畀友好人士、供股抑或公開發售，呢幾個招數都會一下子攤薄「空軍」權益，令到「空軍」突然間中伏！

戴孤劃：大股東接下來會怎樣做？

程更計：大「蠱」東梗係向「空軍」收返之前借出嘅股票，「空軍」被迫要在市場買貨平倉，short squeeze（挾空倉）自然對股價有支持，甚至短期內大幅飆升。勁唔勁？

高　仁：不過，大「蠱」東可能在外面借咗好多孖展，對「空軍」嘅沽空活動都投鼠忌器，即使想施展暗黑版「鷓鴣批」，都唔敢做得咁離譜。呢樣或許係一件好事，否則唔知會唔會成為下一個漢能。

程更計：其實，金融市場亦有很多係自編、自導、自演嘅故事嘅！

本欄逢周一刊出

如想與高仁交流上市公司的財技個案及招數，請電郵至[email protected]。

下一篇：	恒指本季料好淡爭持
上一篇：	滬深港通上周五成交統計

文章：