熱門:

2021年3月8日

高仁 財圈識真假

踢爆造假上市「工具」

各位「巴打」相信都聽過「工欲善其事,必先利其器」這句成語,意思是工匠想要做好工作,一定先要使工具鋒利,比喻要做好一件事,準備工作非常重要。「高仁指點」話你知,有一些內地公司為了尋求上市,可能會不惜鋌而走險偽造賬目,一名前CFO(首席財務官)粉墨登場出席飯局,踢爆了他們造假上市的「工具」。

高 仁:哈哈!為了保護證人起見,今次呢位「吹哨人」出席飯局玩踢爆,將會化名為賈先生,OK?

沈繼司:賈先生,我聽聞你並唔係讀財務出身,又冇乜做財務管理嘅經驗,點解會得到老總垂青領導造假賬嘅?

賈先生:老總諗住將公司搞上市圈錢,CFO在財務「配合」方面係重中之重嘅「工具」,上一任CFO唔願意去全面「配合」,就被老總狠狠地拉下馬。老總之所以揀我去接手CFO,並唔係睇我嘅學歷背景,最重要係我份人夠老實,把口夠密,唔會隨便爆響口;其次係我雖然唔醒,但亦都唔笨,最重要係願打願捱,乜都肯做,唔會托手肘。

高 仁:嘩!老總真係好睇得起你,你係咪揸晒大旗?

賈先生:老總同我說明工作範疇時,表明佢主要管理三大戰略,包括財務管理、公司管理及上市。雖然我唔需要主力負責搞上市,但財務方面就要積極作出「配合」。

沈繼司:「配合」?!哈哈!即係要造假數上市?工程可以好浩大㗎喎。

賈先生:冇錯。公司之前造假數係由一個部門負責製作,但責任太大,導致核心成員走佬。所以,老總建議將正常財務工作同造假賬二合為一,統一由財務部全部成員去做,人人有份,永不落空,而我就要負責睇實整個財務部。

沈繼司:一般而言,造假數嘅公司都會有兩盤數,一盤係畀稅務局睇嘅,另一盤係畀投資者睇嘅。賈先生,你上任CFO之後,搞唔搞得掂呢?

高 仁:我曾經聽過會計界嘅「巴打」講,若果公司要造假數嘅話,CFO選擇合適嘅會計軟件工具係非常重要。

複製賬目 增減憑證

賈先生:高仁果然係「高人」。我發覺國產嘅會計軟件唔係咁啱使,只有台灣某品牌先滿足到要求,其一係佢有Copy整個賬目功能,可以慳返重新再入賬嘅時間;其次是佢有增減憑證功能,仲可以對憑證進行重新排序。對於造假賬嚟講,呢個會計軟件工具真係幫到手。

沈繼司:講到會計憑證,當時你手頭上應該都有唔少「工具」,可以協助造假賬。

賈先生:當公司要造假數上市,最容易方法係谷大營業收入,所以虛假銷售發票係必需嘅工具。

高 仁:我又聽過會計界嘅「巴打」講,核數師在審計年度財務報表時需要詢證函,正規做法係直接發出函件到相關單位,之後再由相關單位蓋章確認;但實際上,有時候核數師會要求公司轉交相關單位,再經由公司財務部交回畀核數師。

賈先生:哈哈!後者係CFO最樂見嘅,造假數公司可能會準備有幾十個公司印章,方便為核數師發出嘅詢證函蓋章,之後慢慢交返畀核數師。所以,內地公司要造假上市,可能會運用咗不少「工具」。自爆系列.之二

本欄逢周一刊出

如想與高仁交流上市公司的財技個案及招數,請電郵至 [email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads