2020年5月22日
5月21日,周四。市場有句老話:最後一個好友都睇淡,股市就見底。對沖基金Appaloosa創辦人泰珀(David Tepper)【圖】上周現身CNBC,指美股估值過高史上第二嚴重,只有1999年甚於目前。泰珀向有美股大隊長之稱,曾經講過I love riding a horse that's running,突然變得咁謹慎,口吻似足價值投資者,老畢實在有啲唔慣。
大隊長幾時開始陪人驚,手上並無資料可稽,但他早輪透露投資組合僅10%至15% net long,也就是說餘下85%至90%不是hedge咗就是持有現金,大好友是否3月下旬轉淡嘜正個底唔清楚,但尾隨的強勁反彈浪可能得個睇字,講估值兼揸重茄殊,說不定一心等第二隻腳出現才回復好友本色,否則以佢老哥喜歡策馬奔馳的作風,無理由愈升愈唔敢買。
愈窮愈見鬼
David Tepper未必真係最後一個好友,但連大隊長都如此步步為營,敢買的人看來真的不多。美股超貴與否,視乎用哪把尺度而已。從【表】可見,不論以市盈率、市賬率、市銷率、股價對現金流比率抑或股息率為比較基礎,等值分配權重(equal weight,每隻成分股佔0.2%)的標普500指數,都比按市值釐定權重的標指和納斯特100指數平好多。股市就同大部分社會一樣,愈窮愈見鬼,愈有愈富貴,泰珀未必真的覺得美股很貴,只是平嗰啲佢唔吼罷了。
貴買唔落手,平連望都費事望,難怪這潮升市沒有最乞人憎,只有更乞人憎,泰珀那些行家,心態應該相差無幾。美銀每月發表一次的環球基金經理調查,最新(5月份)結果顯示,十位芬佬中只有一位預期經濟會出現V形復甦,接近70%認為始自3月下旬的升市僅屬熊市反彈。
平均而言,基金經理持有現金比率為5.7%,驟看並非很高,但2008年金融海嘯時,現金比率都只是5.5%,可見專業投資者今天戒心多高。然而,正因睇好都會畀人鬧,對後市反而唔應該淡,皆因意見影響不了價格,價格對意見的影響卻不容低估,等到愈來愈多人忍唔住手追,基金經理更要補回先前過於保守錯過了的升幅,殘股都有權翻生。
睇好睇淡一件事,惟無人能夠否認, 若非美國政府和聯儲局傾盡洪荒之力救市,世界變成怎樣冇人知。高盛發表過一些估算,如今大概人盡皆知,聯邦政府為州政府失業救濟每周額外補貼600美元, 結果四分三被裁員工領救濟金好過打工。
Dead on Arrival?
美國眾議院上周五通過規模達3萬億美元的新一輪救市方案,再度全民派發1200美元、失業救濟補貼延長大家都知,侵侵同共和黨一句DOA(Dead on Arrival),法案未送交參議院彷彿已判了死刑。
聽落好似冇彎轉,但如果閣下有睇聯儲局主席鮑威爾和美國財長努欽日前視像聽證會點樣畀參議員「質」,你會隱約感到,第一輪大規模救市方案(CARES Act)的問題不在執行(execution)而在設計(design)。許多共和黨人對延長失業救濟補助萬分抗拒,怕整吓整吓失業者連求職都嫌麻煩,變相養懶人。從好幾位議員的提問不難發現,共和黨人一方面不滿養懶人,另一方面十分看重就業。
第二輪救市方案恰好就有針對這方面的措施,構思是營銷損失重大的企業可獲政府直接補貼薪酬成本最多八成,以每名員工年薪6萬美元為上限,比首輪救市的PPP(Paycheck Protection Program)企業貸款計劃去得更盡。
補貼僱主出糧這招,香港、英國、澳洲、南韓、加拿大、法國、德國都在用,連聯儲局前主席耶倫也盛讚這個主意聰明,保就業最有效。民主黨已表明眾議院通過的法案並非最終版本,談判嘅嘢不外give and take,具體措施唔係冇商量餘地,最怕係兩黨講唔掂數,大選又愈嚟愈近,個市倒逼政客妥協,美股因而亂上好一陣。
(編者按:畢老林最新著作《我的投資日記》現已發售)
歡迎訂購:實體書、電子書
放大圖片 / 顯示原圖
訂戶登入
下一篇: | 抗擊華府打壓 中央搶人才科技自主 |
上一篇: | 香港股市上日收市統計 |