呷哺呷哺急挫未必全因米奇

大市連跌5天，恒指最低落到26394點，大跌219點，再創熊市新低，收市反彈至26422點，跌190點，看來很快回補去年7月的上升裂口（26147至26255點），短線縱有反彈，上月低位26871點已有阻力。

呷哺呷哺（00520）這兩日成為「跌市之星」，股價上周五報11.46元，昨日低位9.53元，兩日最多大瀉16.8%，市值縮水逾廿億元。股價急跌係因為內地有報道，指一名孕婦光顧山東呷哺呷哺，發現火鍋內有老鼠，監管當局正就事件展開調查。呢隻「米奇」唔大，只係5厘米，但可能係史上最貴嘅老鼠。

此事勾起一段回憶，筆者當年在北角某家酒樓飲茶，發現雞紮之內竟暗藏煙頭，打聽之下，發現原來酒樓冇糧出，搞到廚房員工好唔開心，不久酒樓終於結業。其實做飲食業，衞生問題係一大風險，最慘就算俾人整蠱，亦好難解釋清楚。

業績遜預期估值離地

說來有點古怪，「老鼠門」事件據報發生於上周四晚上，同日呷哺呷哺股價已急插6.25%，跌破11.92元支持位。換言之事件未發生之前，呷哺呷哺已經破位下跌，除非有人預知「老鼠門」，否則股價下跌可能另有原因，「米奇」只係順水推舟而已。

呷哺呷哺曾是明星股，去年初股價仲係4.6元，今年7月最高18.14元，年半間暴升294%，往績P⁄E高達38.4倍。公司早前派中期成績表，營業額按年增升35.1%，至21.29億元人民幣；純利2.09億元人民幣，增逾11%，低於市場預期的15%至20%。純利漲幅遠低於營業額，反映毛利率縮減。業績交唔足功課，堅離地的估值回歸現實好正常。呷哺呷哺大跌後往績P⁄E降至21.38倍，唔算勁貴，但亦不便宜。

講起飲食股，海底撈（06862）毋懼市況低迷照樣招股，入場費17979.37元仲要係歷來最高，擺明嚇窒散戶。睇番基礎投資者名單，高瓴、景林、大摩、Snow Lake和Ward Ferry都榜上有名，如果散戶冇貨，貨源盡入強者之手，就算市況欠佳，掛牌後表現亦未必太差。