《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年4月9日
各位「巴打」都知道，高仁是金庸的「粉絲」，在金庸最後一部武俠小說作品《鹿鼎記》之中，宮廷及江湖各派勢力都在明爭暗搶一部佛經《四十二章經》，原因是書中藏有寶藏地圖。「高仁指點」話你知，港股也快將有《四十一章經》面世，有望成為搶奪「寶藏」的秘笈，但可能有利亦有弊。
在披露對話實錄之前，請各位「巴打」重溫人物背景，簡介如下：
程更計──本地證券行經紀兼財務顧問，除了招呼散戶之外，亦向上市公司出謀獻計；
施友化──擁有公司私有化經驗的前「唉賓」，被看中轉型為上市公司CFO。
施友化： 喂！你哋之前嗰個送雞迎狗飯局做乜唔預埋我？
高 仁： 我哋知道早排係業績期，驚你要忙住幫公司出業績，咪冇叫到你囉。為表歉意，等我送你一部最新嘅《四十一章經》。
程更計： 高仁，我哋都知道你係金庸嘅die hard fans，但《鹿鼎記》嗰部係《四十二章經》，邊度係《四十一章經》呀？
《上市規則》擬增3章節
高 仁： 哈哈！其實，我係講緊港交所（00388）就新興及創新產業公司上市制度進行嘅市場諮詢，建議容許未有收益嘅biotech公司、同股不同權公司，以及新設便利渠道讓大中華同海外公司來港作第二上市，制定與別不同嘅上市門檻【表】。
施友化： 我都知道有呢份諮詢文件，但同《四十一章經》有乜嘢關係呢？
高 仁： 而家主板《上市規則》有38個章節，建議新增3個章節去落實該3類公司上市，加埋有41個章節，咪就係港股《四十一章經》囉！如果港交所有呢部《四十一章經》喺手嘅話，就可以成為佢搶奪「寶藏」（該3類公司）嘅秘笈，好處多籮籮。
施友化： 我知道！從宏觀角度嚟睇，科技發展一日千里，未來全球經濟增長將由新經濟企業主導，本港容許新興及創新產業公司來港上市，不排除佢哋會來港設立業務或科研據點，有助本港經濟轉型。
程更計： 點止咁。港股本身屬於偏重周期型市場，股份類別選擇唔算太多、較為狹窄，引入新興及創新產業公司來港上市，可以擴大市場嘅廣度同深度，市場更趨多元化，仲可以逐步轉變為創新成長型市場。
修煉真經有利有弊
高 仁： 如果國際知名嘅「獨角獸」【小檔案】成功來港上市，不但可以提升港股競爭力及國際金融中心地位，加上佢哋集資金額龐大，可能有利港交所嘅表現。
程更計： 市場亦普遍看好呢啲企業嘅前景，上市後股價一定睇升，散戶或基金買賣活躍，有助搞活股票市場。散戶可以賺錢之餘，經紀佣金收入都豐厚啲。
高 仁： 誠如武俠小說情節，練功可以練得一身好武功，但也可以練到走火入魔，所以港交所「修煉真經」既有利，亦有弊。例如，引入未有收益嘅biotech企業來港上市，佢哋能否實現業務計劃或成功研發產品存疑，未來營運表現或會較為波動，投資風險可能較高。
施友化： 同股不同權公司嘅爭議性更大，原因是本港一直奉行同股同權嘅原則，目的係要令到所有股東得到公平對待，避免少數股東因享有較大投票權損害小股東嘅利益。
程更計： 如果同股不同權公司上市之後，管理層、創辦人嘅表現大幅走樣，甚至出現董事失職嘅情況，小股東礙於投票權比較少，可能難以透過表決「踢走」管理層。
高 仁： 再者，香港至今仲未有集體訴訟權機制，小股東要控告上市公司管理層嘅訴訟成本非常昂貴，小股東可能較難因公司欺壓股東嘅行為而索償。
施友化：果然係有利亦有弊喎。
近年來，內地企業積極「走出去」在海外大肆收購，但各位「巴打」知不知道當中奧妙之處呢？下周，高仁會揭開吉利集團如何重演海航集團融資收購的把戲。
本欄逢周一刊出
如想與高仁交流上市公司的財技個案及招數，請電郵至[email protected]。
獨角獸（英文：unicorn）
小檔案 : 意思是成立不到10年但估值超過10億美元的科技創業公司
訂戶登入
| 下一篇： | 獨角獸湧A股未必好事 |
| 上一篇： | 港股後抽完成 料再展跌浪 |
