利記與股市

「逢彈必沽」這句格言，除了流行於今天的股市，其實套用在利物浦的身上，或者更加合適。

環球股市急挫，阿梅無心戀戰。剛好英超開鑼，惟有轉戰球場，寄情睇波解悶。眼見奪標大熱出名善守的車路士開閘脫腳，4戰失9球。阿仙奴幾經波折，終求得門神加盟，奈何首戰蝦碌頻頻。曼聯繼續大肆擴軍，無奈鋒線依舊失火。除咗曼城對辦以外，其他實力分子全線甩拖，作為利記鐵粉，內心難免沾沾自喜。

事實上，利記剛經歷完一個失望球季，坊間普遍再沒期望。就在大家死心之際，球隊開季迎來兩勝一和兼且零失球。尤以作客阿記一役中，後防力保不失表現可人。賽後，後防大將Skrtel率先向外抽水，告誡對手不要輕視利記。受壓領隊羅渣士隨即附和回應，點名稱讚高價次貨Lovren進步淡定。外界亦開始紛紛轉軚，聲言利記將成今季黑馬。

Well，睇開睇利記都知，就如同股市一樣，正當所有訊號皆一致向好之際，結果往往慘不忍睹。上周末，甩漏後衞Lovren再次犯下小學雞錯誤，利記主場淨吞對手三蛋。沒錯，又是那盤熟悉的冷水，從股票市場追到來球場，然後好似玩IceBucketChallenge咁兜頭淋。問你「醒」未？

我認識一位股壇前輩，時常說自己看市很準很準。有趣的是，他曾兩次破產。又，我認識另一名篤信風水的朋友，時常說某大師很準很準。有趣的是，他同樣曾兩次破產。

人類有時真的很盲目。事實擺在眼前，卻選擇自己呃自己。「我真的很準㗎，只喺唔好彩啫。」我明，我真的明。阿梅盲撐利記二、三十年，又怎會不明白箇中的道理呢？短線股市表現，就如利記般飄忽，根本無人能測，所以「若要生活好，勿買利物浦」，實在是大有道理的。

http://moybeanplayground.blogspot.com