紮作大師夏中建細訴40載求藝路
「獅王」後人轉跑道巧製花燈創世績

「紮作技藝」與「舞獅」均被列入香港非物質文化遺產項目，分別隸屬「傳統手工藝」及「表演藝術」類別，天寶樓扎作創辦人夏中建與這兩門技藝淵源甚深，其父是已故「一代獅王」夏國璋，然而「生於獅、長於獅」的夏中建，長大後未有繼承父業，反而成為紮作大師，曾創作全球最大型吊掛花燈，打入健力士世界紀錄。他日前接受專訪，分享40載紮作生涯難忘點滴。

以為夏國璋兒子夏中建肯定自小舞獅，原來他很多時只負責收獅頭、執架生，「屋企兄弟多，我排最細，佢哋嗰啲大師級舞完（獅）返嚟梗係鬆人，我呢啲就做下欄嘢，冇辦法，始終一個團隊，總有一個（人）舞頭，一個舞尾，一個打鼓，一個執架生。」

「我哋有個笑話係咁講：做夏國璋個仔，你過年唔使着新衫，剩係着住舞獅嗰件衫，成個正月都係，一隊十幾人，每隊每日走十幾場，即係過100場一日，我就多數做（站在獅頭前）舞龍珠嗰個，冇咁辛苦嘛！成隊人入面叫做唯一有得見樣，哈哈！」夏中建開心憶述。

家業不用他這個孻仔繼承，長大後先投身金融界，背後也跟舞獅有淵源，「嗰陣金銀業貿易場有個『金銀盃』，踢足球嘅，全個貿易場個個班齊人馬想爭冠軍，百幾隊波，足足打兩年，有啲有錢嘅老闆直情搵（當年甲組球會）愉園、南華啲人（職業球員）去踢。」

本身是資深中醫的夏國璋，在賽事中提供醫療服務，夏中建因而認識到各大金銀貿易公司老闆，「一畢業個個叫我去幫手，於是去咗（金銀業）貿易場做對盤，冇幾耐索性買牌（營業牌照）自己做。」經營了兩年多，他自言：「已經搵夠（錢），精神壓力太重，夜晚瞓覺成日扎醒，賭得好大，仲要遇着（1979年）中越戰爭，黐線！一口價已經幾百蚊，嗰陣一両黃金先三千幾蚊。」

師承梁有錦成全科學徒

為怕在金融界遲早「走火入魔」，夏中建決定收山，回家協助父親打理獅館生意，「一個獅頭成四千幾蚊（成本），我哋間館好多徒弟，剩係中港兩地都幾千人，計埋全世界直情過萬，咁多人梗係玩爛好多獅頭。當你一年玩爛30隻，起碼啦，都十幾萬，嗰個年代喺西環環頭環尾已經夠錢買層樓。」

眼見獅頭如此珍貴，夏中建靈機一觸，打算學習維護及修補，藉此為獅館節省開支，父親當然大表贊成，並拍心口為兒子安排拜師學藝，沒想到初時屢吃閉門羹，「無（紮作）師傅肯教，因為個個都知道，一旦教識咗夏中建，呢個世界每年就會唔見咗層樓（即幫襯買獅頭的生意額）。」

皇天不負有心人，最終夏中建獲西邊街生和隆扎作創辦人、有「花燈大王」之稱的梁有錦師傅（已故）收為徒；梁師傅當時剛承接一單大生意，要為香港旅遊協會舉辦的加拿大博覽會紮九條龍，急需學徒幫手，夏中建自言非常幸運，一開始即有機會接觸複雜紮龍頭技術，「仲要有得紮9個咁多，唔識都練到你識。」

他解釋，一個紮作師傅若可造好龍頭、獅頭，那麼其他就會變得簡單，不過最重要有機會練習，「如果唔係有人訂，冇一個師傅會專登為咗教徒弟，紮完個龍頭之後掉咗佢，要錢㗎嘛！萬一間舖頭只有紙紮公仔嘅（訂）單，徒弟可能跟師傅一世，都只係做紙紮公仔。」

正因生和隆當年客似雲來，各類訂單不斷，夏中建跟着梁師傅「樣樣有得學」：龍、獅、花炮、牌樓、花燈等，「我呢啲叫所謂『全科學徒』，師傅佢乜都識，好自然將啲最難最辛苦嘅交畀徒弟做，就係咁我先可以學晒最難嘅嘢先，所以好快就上手。」

攻一條龍殯儀親當喃嘸佬

機會多加上自身努力，夏中建很快學滿師可自立門戶，惟當時市場只有香港旅遊協會及市政局訂製花燈，且生意全由生和隆包辦，他不想「教識徒弟無師傅」，故初時主攻先人祭品，直到多年後師傅退休才進軍獅頭、龍頭和花燈等業務，「火燒紙紮無窮無盡，日夜都有得做，交啲貨畀喃嘸師傅、長生店。」

「做做吓發現，嗰啲人（部分）心態係『無明天』，可能見得生死太多，覺得今朝有酒今朝醉，（思想）好腐化，有錢就使晒佢，仲會賴皮唔找數。」求人不如求己，於是夏中建索性自行開設長生店、花舖，並與原有紮作店配合提供一條龍服務，不假外求，「喃嘸我都識，師傅話我唱到好似唱大戲咁好聽。」

歲月無聲消逝，如今夏中建已是紮作業內數一數二的大師級人馬，名成利就，依然抱着「得到了我會繼續進取」心態，曾於2017年拿過健力士世界紀錄，製作當時全球最大10米吊掛紮作花燈的他，最近又帶領逾1000人，炮製13米高中式花燈，希望再次挑戰世界紀錄【見另稿】。

半生創作不倦獲客人尊重

大半生從事紮作，夏中建自言從無沉悶或厭倦感覺，「一個人做一個行業可以做到『收工』，已經算係人生最大恩賜，搵到食又鍾意做，唔使成日擔心要搵工；我做紮作，假假哋都叫『非遺』（非物質文化遺產）吖，啲（客）人係拎住銀紙嚟『夏生唔該你幫我造件乜造件物』，個個都對我好有禮貌同尊重，從來唔會話『喂紙紮佬，我要點要點』，否則我睬佢都儍，你叫佢返屋企啦！」

人生崗位彼此或有不同，然而目標一致，就是提供專業服務，推動持續發展。

採訪、撰文：許鎮邦攝影：黃潤根、受訪者提供