越位射手王

達聞西聽過祖雲達斯中鋒莫拉達嘅外號叫「禁區之狐」，以前一路覺得佢冇咩特別之處，若論禁區把握力同鑽營能力等等，同祖記師兄大恩沙基差九條街到啦！周三歐聯巴塞隆拿作客2比0擊敗祖記，莫拉達更加入咗3球——越位入波。

28歲對一位中鋒嚟講，應該係最黃金嘅階段，各方面技術都爐火純青，居然連越位都唔識得破，仲要一場波衰足3次？呢次佢分別喺15、30同55分鐘破門，結果頭兩次旁證舉旗示意，第三次就由VAR通知球證越位在先，原來凸咗半隻左髀出嚟。

咁仲唔係最離譜，莫拉達近4場波有5次入波判越位，近兩屆歐聯更加13次吹罰越位，係得車路士前鋒迪姆華拿拍得住佢。而同一場波3次入球無效，原來喺2016/17球季對拉斯彭馬斯都試過，真係可以講係毫無長進。

巴塞脫胎換骨

前鋒一味向前衝，後衞就要轉身向後跑，又使乜咁心急要呢？睇定啲，等隊友出完腳再跑都未遲，更何況呢位西班牙球星步大力雄，等閒後衞點夠佢快呢？達聞西就勸莫拉達睇下大恩沙基點樣走位，一定可以搣甩越位射手王嘅標籤。

另一方面，對手巴塞送走瘟神會長巴杜美後，全隊面口都唔同晒，結果全場佔盡優勢下，靠奧士文尼迪比利同美斯入波奠勝。賽後官方Twitter網編仲出帖，嘲笑祖記球迷終於現場見識到GOAT美斯嘅表現，GOAT即係史上最佳球員咁解。

祖記網編又點會保持沉默啊？即刻留言：「睇嚟你哋查錯字典啦！等下次作客C朗出到場，你哋就知係咩一回事。」每個人心中都有一隻山羊（GOAT），唔使贏場波就踩對手，萬一唔好彩下次輸咗波，咪實畀人笑番轉頭？

巴塞的確有脫胎換骨嘅味道，教練朗奴高文賽後都同美斯擁抱，過去有咩牙齒印都好，呢一攬都已經化解得乾乾淨淨。「我同美斯一向冇咩矛盾，係外界亂估啫！巴杜美走對我有咩影響？場外嘅嘢我控制唔到，我淨係負責教好波。」高文講。

將來嘅嘢將來再講，自己控制唔到，又何必擔心？如果，高文帶隊攞到好成績，就算要執包袱走人，巴塞球迷都會感謝佢，做教練做到咁，夠啦係未啊！

下一篇：	周三主要足球賽果及主要足球賽程
上一篇：	紓緩腸胃不適──低FODMAP飲食法（下）

文章：