玉樹臨風整蠱專家

好懷疑摩連奴5年前遭車路士第二度炒魷後，決定轉型做一個玉樹臨風嘅整蠱專家。唔係2016年點會接手死對頭曼聯？兩年後再次接到大信封，居然舊年願意任教車仔嘅宿敵熱刺？上述決定都好無厘頭，唯一解釋就係整蠱隊波嘅啫！

遠嘅唔講，就攞教緊嘅熱刺嚟講。開季第一場波不敵愛華頓，摩連奴居然已經玩卸膊，埋怨球員懶懶閒唔追波，結果平時最低調嘅後衞賓戴維斯，都忍唔住駁嘴：「大家都好努力啊！雖然表現麻麻，但絕對唔係唔努力囉！」

更大危機係，有傳大將迪利阿里都同摩連奴反咗面，甚至可能要離隊他投添！呢位囂屎領隊同主力反面，過去響皇馬、車路士、曼聯都試過啊！根本好似預先寫好嘅劇本，接落嚟將會內訌、革命、成績不濟，結果不外乎炒魷或辭職。

熱刺同摩連奴真係嫌唔夠麻煩，居然會借加里夫巴利回巢一年，各位球迷覺得好事定壞事呢？達聞西就覺得不敢樂觀啦！首先，自從加里夫巴利2013年離開熱刺加盟皇馬，球隊已經有翻天覆地嘅變化，可以講打上普捷天奴嘅印記。

難復當年勇

熱刺目前領袖係哈利卡尼、艾歷迪亞、迪利阿里，「馬騮王」加里夫巴利突然番咗嚟花果山，發現支「齊天大聖」旗已經換鬼咗，究竟應該邊個先係大佬呢？而且，將來戰術係咪要圍繞加里夫巴利呢匹快馬呢？隊長哈利卡尼又肯唔肯過佢呢？

大家咪唔記得，加里夫巴利近年備受傷患困擾，就算撇除同皇馬鬥氣詐傷嘅水分，呢位快馬都已經難復當年勇。加上英超啲體力化踢法，隨時打幾場波就再傷過；一年人工1200萬歐羅加埋醫藥費，熱刺隨時蝕大本啊！

以目前熱刺嘅人腳，需要一個靠得住嘅後備中鋒，哈利卡尼冇可能年終無休㗎嘛。點知熱刺走去搵個側擊球員番嚟，法國球星盧卡斯莫拉同南韓嘅孫興民表現好好啊，第日邊個要讓個位畀「馬騮王」呢？咁又會唔會引起矛盾呢？

所以呢，買球員唔係話免費就抵，名氣大就仆過去買，要睇下球隊嘅需要同陣容架構！當然，喺摩連奴嘅角度睇，買咩人係領隊話事，不過球員條氣唔順，落場跑唔郁、叫唔聽，就唔好賽後阿趦阿趄（阿之阿左）啦！

下一篇：	迎春接福
上一篇：	間歇性禁食法（上）－－好處和方法

文章：

玉樹臨風 整蠱專家