《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年9月4日
香港頂級講波佬Peter黃，曾以「跑得慢！唔夠快！無速度！」形容加利仔，當年通街都係紅魔鬼球迷，佢敢有嗰句講嗰句，認真難得！加利佬如今做埋講波佬，同Peter黃做咗行家，世事係咁神奇。
達聞西追開加利佬啲專欄，發覺佢嘅分析能力非常出色，可以講係「有腦聰明兼醒目」，尤其係評論起紅魔鬼嘅問題，經常有獨到嘅見解，完全冇因為係母會就刻意唱好，可見亦係專業嘅評論人。
加利佬日前就一錘定音：「以曼聯目前嘅人腳，今季唔使旨意贏英超。」佢嘅理由係起碼有4、5個位置要加強，「我之前提過好多次，但每次買人都太遲，我作為球迷絕對幾沮喪下！」荷蘭新星雲迪碧克加盟仲未夠？
當然唔夠啦！甚至可能係一個錯嘅決定，雲迪碧克係中場全能球員，但正因為全能反而唔見有咩突出，你話佢係進攻中場咩？創造力又差啲；防守咩？又唔係硬朗型。以上特點，係咪同普巴、波基斯費南迪斯好似呢？
問題就出喺呢度啦！既然買咗波基斯費南迪斯，何必又買雲迪碧克呢？呢位荷蘭新星話鍾意插入禁區入波，呢個工作波基斯一直做緊啊！三大中場竟然冇明顯分別，仲不如留個位畀純防中嘅費特啦！
同一個位置有幾個球星，咁其他位置仲有咩資源增兵呢？好似傳得好盛嘅多蒙特前鋒查頓辛祖，就因為1億歐羅身價而放棄。錢就係得咁多，但有成半隊波要執，曼聯仲走去重複買人？抵班高層成日畀人鬧嘅！
唔好依賴個別球星
加利佬仲有個觀點好啱，就係查頓辛祖唔嚟冇損失。球迷成日會覺得買到某球員，隊波就會一天都光晒，足球唔係咁樣㗎！「其實可以睇實唔同目標，一有機會就搶人，好似哈利卡尼咁！」加利佬講道。
一人救全隊？C朗、美斯、尼馬都唔得啦！好似巴黎聖日耳門歐聯就喺決賽落敗，美斯博離隊搞到魯營天翻地覆等等，就證明唔好再依賴個別球星。利物浦、曼城、拜仁、皇馬，通通都係好例子。不過，曼聯最大問題都係重複買人，好似身價最高嘅中堅哈利馬古尼，最近就傳要買中堅高列巴尼鞏固防線，咁係咪要借連迪路夫畀人呢？有啲耐性栽培下球員啦，咁樣洗腳唔抹腳，多多錢都唔夠！
放大圖片 / 顯示原圖
訂戶登入
| 下一篇： | 上天保佑 |
| 上一篇： | 可可對健康的好處和選購 |
