《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年8月19日
好記得，新加坡陳姓部長奚落過港人搶口罩係「monkey see monkey do」嘅愚蠢行為，勢估唔到呢個亞洲大都會人才濟濟，好似華倫西亞嘅班主林榮福同主席梅菲咁，就將呢個國家嘅創意發揮到極致——借據當出糧！
林榮福入主「華倫」6年使咗唔少錢，打過3季歐聯最叻今季十六強止步，可惜聯賽最終排第9，無緣下季歐聯資格，再加埋新冠疫情嘅打擊，財困嘅「華倫」6月起有汗出冇糧出，近日前新加坡外交官嘅梅菲一人畀個信封予職球員。
班球員滿心歡喜打開，唔係炒魷亦唔係支票，而係一張借據，上面寫明下個月出糧，但張借據有效期係到2021年9月。球員梗係唔肯過佢，於是派出代表同會方談判，林榮福借商業考察走咗去，留低梅菲大玩外交詞令。
梅菲話新冠疫情下，收入比以往減少一半，其中電視轉播費少30%，商業收入少50%；應承注資起球場嘅合作夥伴又甩底，先搞到球會冇錢出糧，「大家都唔想球會破產㗎？」共患難係華人文化精髓，可惜班球員似乎唔多buy！
隊長柏利祖同高基連急急腳轉投維拉利爾，之前確診新冠肺炎嘅阿根廷前國腳加雷淪為自由身，睇嚟球星費倫托利斯加盟曼城帶來2300萬歐羅收入，只不過杯水車薪。職球員要會方保證幾時出糧，否則有更多人離隊。
大家係咪覺得球員冇義氣呢？錯！林榮福位網紅千金林慧俐，之前睇波畀球迷噓餐飽，竟然喺社交網站反擊：「你班人明唔明啊？我哋買咗間球會㗎啦！鍾意做乜都得！」嘩！啲口氣咁鬼土豪㗎？新加坡唔係應該好西化㗎咩？
狂換教練
林家上下真係當「華倫」係私人財產，入主6年用過6位教練，不如叫林慧俐親自落場教啦！至於出糧單嘢，林家好應該私人揞荷包吖！唔應該賴閉門作賽，球迷入唔到場令收入少咗！話時話，「華倫」獨創借據出糧法，其他球隊千祈唔好「monkey see monkey do」，做番個負責任嘅班主，尤其係來自亞洲嘅老闆，咪衰比美國同中東啲班主睇啊！
放大圖片 / 顯示原圖
訂戶登入
