熱門:

2020年8月7日

達聞西 競技研究院

壞得有情理!

澳洲球手基利奧斯係網壇嘅非洲和尚,脾氣臭、把口仲臭,球證又鬧、賽會又鬧,甚至球迷都鬧埋,可以講係麥根萊嘅最佳接班人,係差在成績唔夠班。不過,「壞孩子」有佢可愛之處,就係講嘢夠直腸直肚。

好似月底嘅美國網球公開賽,費達拿同拿度等歐洲球星紛紛缺席,理由不外乎擔心美國疫情。唯獨基利奧斯夠膽批評搞手同參賽者自私,「疫情咁嚴重,示威活動立立亂,你哋仲諗住積分同獎金?咪咁自私啦!」

迪祖自私

講起網壇第一自私鬼,就非塞爾維亞球王迪祖高域莫屬!佢到今日仲堅持參加美網,係極少數去美國參賽嘅歐洲球手,另一位名將係英國嘅梅利。「我好希望參加,仲觀察緊疫情發展,如無意外都會出戰,」呢位網壇一哥講。

好多職業球手都期待開波,咁樣就可以維持生計,最多歐洲球手打歐洲比賽,美國球手打美國大賽,以免坐長途機感染病毒。不過,基利奧斯覺得應該停止所有比賽,等疫情過去先復賽,佢就連10月法網都唔打。

「機會好細,細接近零!我會趁呢段時間,留喺屋企陪伴家人,做個負責任嘅人。一啲球手嘅言論同行為,我真係覺得好差!佢哋仲要係圈內嘅領袖人物,咁就更加要做個好榜樣啦!」基利奧斯又忍唔住批評同行啦!

畀費達拿話都算啦!畀壞孩子基利奧斯話,就真係好面懵。呢個「壞榜樣」當然係指迪祖高域啦!佢之前搞巴爾幹網球慈善賽,賽後去夜店唱歌跳舞,搞到自己同好多參賽者確診,結果要公開出來道歉。

不過,奇就奇在迪祖高域見過鬼仲唔怕黑,今個周末恢復慈善賽,呢一站喺克羅地亞第五大城市札達爾舉行,希望呢次會做好啲防疫措施,千企咪再搞出個大頭佛,唔係就真係做咗抗疫嘅最壞榜樣啦!

基利奧斯嘅抗疫表現隨時扭轉形象,之前喺社交網站發表《給網球的信》,落足洋蔥一字一淚:「冇人比我更希望保就業,我指餐飲、清潔等行業,而唔係我哋網球員!點解我哋唔為下別人着想?」

係啊!疫情下行行都困難,但再難都唔應該攞抗疫工作較飛,尤其係喺前線嘅醫護人員!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads