千祈唔好貪口爽

愈有power嘅人，講嘢愈要謹慎，一係乜都唔講，講咗就要做得到！如果唔係？嘻嘻！第日再講嘢，啲人當你技安唱歌。波神佐敦套《Last Dance》紀錄片，響新冠疫情下幫到好多人解悶，不過，舊隊友就好似唔係幾happy。

呢套自傳式紀錄片，自不然提到好多陳年往事，波神從自己個角度去講，當事人可能有唔同感受。

好似佐敦講到有次「眼鏡蛇」格蘭表現唔好，於是攞走食物唔畀食！格蘭睇完話：「識我嘅人都知，咁嘅情況我係會打鑊佢。」

空中鬧劇

格蘭話佐敦叫空姐唔好畀飛機餐佢，於是行到波神面前爆輪粗口，先講：「如果你想食我個餐，自己過來攞！最後，佢當然冇咁做。」格蘭話拍片嗰陣，自己有講番實情，點知出街後剪走晒，搞到眼鏡蛇好蛇gwe（Scare）咁。

佐敦嘅最佳拍檔「二哥」柏賓，出名脾氣好、甘心輔助大哥，點知睇完套紀錄片都有啲意見。原來，佐敦提到柏賓有次暑假唔做手術，等到季前先嚟入廠維修，批評咁樣好自私。達聞西覺得柏賓唔係咁冇義氣嘅人，其中一定有啲誤會。

當喜劇看

其實，以佐敦嘅波神地位，的確夠資格評論隊友，而且呢類自傳唔爆啲料，又點吸引觀眾呢？格蘭同柏賓應該睇開啲，咪當笑片睇囉。好似變色龍洛文咁，夠被爆當年請假去玩，佐敦殺上佢屋企搵人，仲見到女友赤裸瞓響地。

「咪咁玻璃心啦！佐敦當年心態係我做到你哋做唔到嘅嘢，自己願意付出一切！積遜教練相對比較寬容，反而佐敦較嚴厲。」洛文講。「啱啊！佐敦做到加零一，隊友自願落場做下把，上台領獎識講：大佬行先！如今講兩句，你哋就自尊受創？」

講開又講，如果洛文拍套同北韓領袖金正恩交往嘅紀錄片，相信收視率會超越波神套自傳電影。

佢最近仲話同北韓有聯絡，仲話如果見到金正恩個妹管理緊國家，就知道有啲嘢唔妥！之前金正恩忽然蒲頭，好多人話係影武者扮，唔通……

下一篇：	NBA或奧蘭多復賽
上一篇：	周六主要足球賽果

文章：