《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2014年12月1日
今年「三色台」台慶真是別具「意義」，有「魔童」之稱的「Wiki王」開台「贈興」，「大婆台」一於少理照樣舉辦萬千星輝頒獎典禮，好讓新晉視帝、視后誕生。要成為視帝、視后，靠的可能是演戲天分、觀眾緣，以及「後台」。而要成為殼王、殼后或殼主，靠的則可能是蠱惑必殺技，各位「巴打」與「絲打」欲知詳情，請看高仁、戴孤劃及程更計的飯局內容。
在披露對話實錄之前，請各位「巴打」與「絲打」看看人物背景，簡介如下：
戴孤劃──又稱為戴Sir，《信報》「蠱壇辨虛實」專欄作家，上市公司大股東，經常欺壓小股東；
程更計──本地證券行經紀兼財務顧問，除了招呼散戶之外，亦向上市公司出謀獻計。
戴孤劃：高仁，你早排咪講過，上市公司殼價炒到飛起，究竟個價升到乜level先？
高 仁：我啱啱嚟到，等我飲啖茶先啦。呢個專業問題，留番專家代答。
大股東押股借錢最方便
程更計：老實講，一隻主板上市公司嘅殼股，有啲價錢已經升至4億半至5億元，而一隻創業板上市公司嘅殼股，價錢「坐底」都升到要2億元，靚啲嘅殼就可以做到3億元。
戴孤劃：照咁計，炒殼咪仲好過炒樓！？
高 仁：戴Sir，呢一樣嘢我一早就講咗啦，乜你冇睇過我之前果篇「炒殼股攻略」咩？
戴孤劃：篇文幾耐之前先？
高 仁：大概舊年年頭啦。而家，我啲「粉絲」都經常問點樣買到我本《財圈識真假》本書，其實經「信網購物」就可以訂到，會員同訂戶仲有折。
程更計：高仁，知你勁嘞，有咁多「粉絲」。戴Sir，話時話，你有咁多上市公司喺手，有冇諗過放一、兩隻出嚟套現？
戴孤劃：唓，我又唔等錢使，做乜要賣殼喎！要錢周轉嘅話，最多咪攞啲股票去抵押，咁咪仲好！
高 仁：說話就唔可以咁講，戴Sir有「食力」當然冇問題，但大股東冇「食力」就容易出事！
程更計：高仁講得無錯。我的確見過唔少cases，大股東押股借錢，之後被人食咗隻殼。
戴孤劃：（正食緊隻蟹鉗，聽到差啲鯁親）嘩！咁都得？
高 仁：梗係，唔係點可以有咁多殼王、殼后喎。
程更計：殼王、殼后下面通常都會有「財仔」，方便債仔、即係上市公司大股東光顧。
高 仁：假如大股東無錢想借2億元周轉一下，財仔要求做資產抵押，你係大股東會點做呢？
戴孤劃：最方便咪攞上市公司股票去做囉。
高 仁：Yes, that's right。咁就中正蠱惑殼主嘅下懷囉。
程更計：係呀！若果蠱惑殼主(目及)中你隻殼嘅話，就會要求你抵押成隻殼即係控股權畀佢，而抵押股份有margin requirement，當股價低過某一個水平，就會call margin要求top-up。
戴孤劃：咁都冇乜問題啫。
高 仁：梗係唔會咁簡單啦。
暗手股票壓價收殼
程更計：蠱惑殼主通常會有暗手股票【小檔案】，先將股價壓低call margin，要求大股東用錢補倉，試一試你嘅實力。
戴孤劃：有錢還咪無事囉。
高 仁：但係，佢哋試得幾次之後，就會清楚大股東嘅底細，基本收回本金之後，就會大力壓低股價，去迫大股東還錢。
程更計：大股東還唔到錢，「財仔」就會即時斬倉，最後蠱惑殼主就可以成功收殼。
高 仁：以今時今日嘅殼價，蠱惑殼主見到大股東押股借錢，心裏面一定好高興。因為，大股東唔還錢仲好，可以乘機攞埋隻殼。
戴孤劃：嘩！乜原來有咁多蠱惑殼主，好彩我無押股借錢啫。
程更計：如果戴Sir想押股借錢但又唔想俾人知，其實我有好辦法囉。
高 仁：阿程又有奸計？
戴孤劃：好，阿程「醒」你一碗天九翅漱漱口，等一陣再講。
程更計：多謝戴Sir。（飯局未完，下周再續）
本欄逢周一刊出
歡迎交流上市公司的財技個案及招數，請電郵至[email protected]。
小檔案
暗手股票
意思：暗地裏由人頭持有的股票
放大圖片 / 顯示原圖
訂戶登入
