2023年10月2日

高仁 財圈識真假

「割韭菜」大師

各位「巴打」，各行各業技藝造詣極高的人，大家都會尊稱其為大師。風水大師會為人指點迷津，財演X大師則是散戶的股海「明燈」。「高仁指點」話你知，內地IT界也有一「位」魯大師（03601），近期一連串舉動引起中港投資者熱議，原因是其疑似成為「割韭菜」大師。哈哈！

程更計：高兄，我睇過你上個月中〈假離婚 真減持〉嘅文章，當中內地上市公司三六零（601360.SS）實際控制人周鴻禕與妻子胡歡經友好協商離婚，後者獲分割近百億元人民幣股票，呢個「天價分手費」真係好誇張！

鍾國通：沒錯的！他們被國內哥們質疑「假離婚、真減持」，令到公司股價一沉不起喔。

高　仁：哈哈！正所謂好戲連場，周鴻禕控制的三六零旗下本港上市公司魯大師，最近都搞出咗個大頭佛。

程更計：高兄係咪講緊魯大師派特別息「彈弓手」、被「巴打」質疑大股東趁高沽貨，公司股價仲坐過山車單嘢？

鍾國通：嘩！香港股市也有這樣的情況？你們快說來聽聽吧！

派特息彈弓手 股東疑趁高沽

程更計：呢件事首先係，魯大師突然於9月11日發出通告，指董事會將於9月21日舉行會議，以考慮宣派特別股息嘅建議。要知道嘅係，2019年10月上市嘅魯大師，自從2020年派發過一次2019年度末期息，此後就冇派過任何股息。當消息公布之後，投資者心情自然特別亢奮，股價幾日內飆至最高1.94元，累積升幅高達73.2%。

高　仁：董事會會議召開前一天嘅9月20日，離奇事件卻發生在魯大師身上，其股價離奇插水，一度暴瀉近五成，收市險守1元關口，但仍較公布消息前的1.12元為低，成交股數有4403萬股，較前一日激增129倍，顯然係有人大手沽貨啦！

程更計：魯大師於之後一天（即9月21日）嘅早上發通告指出，主要股東誠盛（三六零旗下公司）上日減持了3434.3萬股股份，佔已發行股本12.77%，持股量由30.76%降至17.99%，估計套現約4200萬元。

高　仁：更慘嘅係魯大師再於收市後發公告表示，經綜合考慮近期股份價格及成交量出現不尋常波動，為充分評估有關宣派特別股息嘅影響，董事會會議取消舉行。

鍾國通：上市公司宣布考慮額外分紅令股價暴漲，大股東被質疑「精準」減持套現，之後又取消分紅計劃。魯大師這種「忽悠式分紅」，豈不是在割小股東韭菜？

程更計：呢個情況令人聯想到近年流行嘅微信女「唱高散貨」！

高　仁：雖然本港上市公司都曾經試過派息「彈弓手」，例如2020年初當時已除淨嘅滙控（00005）取消派發已宣布的股息，主要係因應英倫銀行旗下審慎監管局嘅要求，讓銀行保留資金應付疫情挑戰，魯大師今次情況則完全不同。

鍾國通：沒錯呀！兩次情況基本上絕對是完全不同，這次可能是魯大師的董事局突然間改變主意呀！

程更計：特別股息係股價敏感消息，先話想派跟住又話情況有變唔再諗，咁算唔算誤導先？更耐人尋味嘅係，究竟聯交所同證監會有冇take action呢？

高　仁：「隻鷹」近排煩緊虛擬資產交易平台JPEX龐氏騙局單大嘢，佢哋嘅員工應該都會忙到一頭煙。但據估計，個會或「隻鷹」亦會釘實魯大師，不停向上市公司出Q（Questions）問到翻艇，相信而家大師已經喺度答緊Q。

本欄逢周一刊出

如想與高仁交流上市公司的財技個案及招數，請電郵至[email protected]。

下一篇：	申洲勢隨大客復甦 候70元買
上一篇：	第四季減息降準機會仍大