有盤在手就有偏見

8月16日，周三。本月初，老畢以〈等埋最後一個淡友轉軚才食糊〉為題談論美股，文內提及華爾街最紅的兩位策略師俱屬大淡友，當中大摩（摩根士丹利）威爾遜（Michael Wilson）上月底已承認太悲觀睇錯市，剩下小摩（摩根大通）科拉諾維奇（Marko Kolanovic）孤軍作戰繼續看淡。

當時的想法是，一旦連這位摩通悍將也扯白旗投降，美股恐怕便真的見頂，潛台詞乃最後爆升不日上演，科拉諾維奇一天未認輸，投資者都毋須急於離場。

食得唔好嘥？

兩周後回望，不得不承認，作為操作者，在下雖只關心「荷包」，並唔在意牛熊激辯誰對誰錯，但只要有盤在手，就不可能沒有偏見（bias）。當時已察覺，放棄做對沖的市場參與者愈來愈多，戒心鬆懈很可能是「穩定孕育不穩定」的先兆，但一來海量資金仍然停泊在貨幣市場基金收息，二來專業投資者（基金經理）對牛市始終存疑，取態審慎之餘，現金水平也偏高，意味大戶散戶皆有彈藥為終極爆升供應燃料，即使調整乃早晚的事，既然有機會賺盡，心態上也就食得唔好嘥。

老畢所說的「偏見」，正是操作者甚難避免的主觀意願，像我一樣，對市場過於老定雖感不安，惟勢頭一日未轉，總信最後爆升能夠成真，一個淡友轉軚唔收貨，係都要湊夠一雙才肯食糊。

今年5、6月間，美國科技股相對小型股表現處於十分極端的水平，在下眼見值博率高，心想押注細股輸咗都抵，於是開倉Long Call 10月到期羅素2000指數ETF（代號IWM）、行使價190美元的價外期權，當時IWM仍徘徊於170美元這個重要支持位，能否守穩不過五五波。

止賺比止蝕難

事實證明，小型股整個夏季都在踩油追落後，期權很快便由價外入價內，如果老畢唔係衰貪心，在威爾遜投降時便見好即收，隨着IWM一度逼近200美元，個Call四個二買可以十二個六走，也就是一蚊變三蚊。弊在主觀上偏信美股還有終極一升，索性拿科拉諾維奇當「燈」辦，點都要等埋佢轉軚才平倉，結果這兩星期美股不再風平浪靜，IWM爆唔穿二百，轉個頭下試百九，隔夜收市失守該水平，老畢手上期權變回價外，莫說三個開，剩下的三成利潤能否捱得過今晚都是未知數。

交易就是這樣，永遠要事後才知什麼決定方為最正確，太早走怪自己捉到鹿唔識脫角，博賺盡失手又怨有食唔食罪大惡極，只要人在場內，免不了時刻跟心魔作戰，很難不受情緒影響，當坐住個靚盤，便會發現止賺比止蝕更難。

近日所見，中國通縮、經濟頹、內房爆煲樣樣齊，美國10年期債息高見4.2厘，美滙指數重上103，客觀上皆對風險資產不利，美股表現算硬淨了。然而，波動低、賺錢易的時段恐已過去，8月傳統上交投淡靜，起起伏伏變得頻繁，十個八個交易日見財化水，老畢就係人辦，形勢不一樣，風險管理自然要加強。至於科拉諾維奇，唱淡差不多一年，捱咗咁耐終見「曙光」，望佢老哥轉軚，睇怕難過羅素2000指數拗腰反彈脫離險境，讓老畢個Call得以起死回生。

現在檢討，還有一點是我先前沒想到的。過去半年，標普500指數拾級而上，離歷史高位一步之遙。老畢的感覺是，專注於造淡波動性策略（short volatility strategies）的量化基金早就All-in，但由真人操盤的基金對牛市缺乏信心，並不急於追貨。剛看過美銀最新8月份環球基金經理調查，發現我還是高估了「芬佬」的戒心。