2021年5月31日
各位「巴打」,現今21世紀新時代,大家以電話交談的次數相信已是寥寥可數,相反社交媒體通訊軟件變成了主要溝通渠道。「高仁指點」話你知,本港股票市場騙徒也懂得與時並進,在社交媒體利用頭像作為「包裝」(高仁註:實情應該是掩飾),令散戶在不知不覺間墮入陷阱。
戴孤劃:程總,為什麼你的微信頭像常常都在變?
程更計:我作為一名證券經紀,客戶有時候會透過微信落盤,我當然要以最好一面示人,所以咪成日更換頭像張相囉。
高 仁:戴Sir可能擔心你係「微信女」詐騙咋。
戴孤劃:沒錯。近年來,各大社交媒體平台股票詐騙案愈來愈多,我的微信也經常出現來歷不明的年輕女生,她們會先和你搭訕兼噓寒問暖,之後再推介股票;Facebook賬戶又會有人自稱投資大師,或者冒認知名股評人及投資專家,提供股票投資意見。
程更計:咁戴Sir想唔想知行騙嘅具體手法?
戴孤劃:當然想。
高 仁:哈哈!阿程點解會咁清楚嘅?
程更計:戴返頂頭盔先,我做得證券經紀呢一行,一定要知道騙徒嘅蠱惑招數,免得誤墮法網。
藉社交媒體誘「魚」落搭
高 仁:騙徒要得逞,首要有合適嘅犯案工具,就係自己持有或操控其他人嘅證券戶口,包括可能向親朋戚友借用戶口,從而形成大量「人頭戶口」,方便部署搭棚。
程更計:接下來,騙徒會施展易容術,假扮成妙齡少女、財演、基金經理、投資專家等等,再喺微信、Facebook、Telegram等「公海」搵「魚」。
戴孤劃:他們一開始推介的股票都沒有問題,大部分投資者都可以獲得微利啊!
高 仁:戴Sir,佢哋畀啲甜頭出嚟等啲「魚」落搭嘛!
程更計:騙徒之後就會揀選一啲市值細、股價偏低、交投疏落、股權高度集中嘅「細價股」作為目標,利用預先安排好嘅「人頭戶口」低位買入大部分股份,以便進行挾倉並慢慢推高股價。
高 仁:微信女、財演、基金經理、投資專家接住會出場,喺各大社交媒體或通訊軟件嘅炒股「谷」(group,群組)大肆唱好呢隻「細價股」,散播呢家公司傳聞嘅利好消息,引誘市場上嘅「魚」慢慢游近買入。
戴孤劃:這個時候的「細價股」股價相對平穩或升幅較為緩慢。
程更計:梗係啦,騙徒引誘緊啲「魚」上釣高位入貨嘛,當「魚」嘅數量愈來愈多嘅時候,騙徒便會一次過拋售全部股份離場,導致股價洗倉式暴跌,令到散戶輸身家。
高 仁:講到底,呢個都係「唱高散貨」嘅股票騙局,只不過加入咗新世紀嘅現代元素。
戴孤劃:(普「東」話,普通話+廣東話)這不是廣東話的一句話「橋唔怕舊,最緊要受」。
高 仁:哈哈!沒錯沒錯。
本欄逢周一刊出
如想與高仁交流上市公司的財技個案及招數,請電郵至 [email protected]。
訂戶登入
下一篇: | 恒指波動 29405見阻力 |
上一篇: | 滬深港通上周五成交統計 |