熱鍋上的螞蟻

各位「巴打」，最近阿里巴巴（09988）旗下螞蟻集團（06688）的世紀IPO，A+H股在中港兩地同步上市前臨門夭折，引起市場巨大迴響及不同揣測。高仁與「豬朋狗友」戴Sir和程更計也不禁要「回帶」，拆解這隻恐怕已變成熱鍋上的螞蟻，到底為何會惹到一身蟻？

程更計：今個月嘅新聞嚟講，除咗Trump同Biden嘅美國總統大選對壘之外，你哋覺得邊一單最具爆炸性呢？

高　仁：梗係螞蟻上市計劃突然遭煞停啦，各位「巴打」剝花生都剝到手軟。

戴孤劃：在螞蟻上市前夕，國家四個部委──人行、銀保監、中證監、外管局突然聯手行動，約談公司實際控制人馬雲、董事長井賢棟，做法前所未見，反映事情正在急劇變化。

馬雲放狠話或為表不滿

程更計：冇錯。螞蟻之後就刊發公告指出，近期內地金融科技監管環境發生變化，可能令公司不符合相關發行上市條件或訊息披露要求，決定暫緩A股及H股上市。

高　仁：全球最大型IPO胎死腹中，市場傳聞及揣測隨之四起，有「巴打」回帶到一星期前嘅金融峰會，指出馬雲三連炮轟國家部門同監管機構，一說監管機構太嚴格，二話金融機構太保守，三斥銀行太落後，有可能激嬲話事人。

戴孤劃：哈！以馬董這個級數的大款，一般會有直達天庭的渠道，不排除早已收到消息不能上市，放狠話可能是抒發不滿而已。

程更計：其實，內地早幾年網貸平台一度相當泛濫，之後更出現「跑路」、「爆雷」等情況，迫使中央大力整治網貸平台。當局而家話金融科技監管環境有變，不排除係螞蟻以金融創新作為包裝，再繞過金融系統監管惹禍。

高　仁：都有咁嘅可能。螞蟻除了2004年建立咗鼎鼎大名嘅支付寶之外，2014年相繼推出花唄、借唄嘅微貸科技平台，呢一樣先至係公司最搵錢嘅業務，佔今年首6個月收入接近四成。勁呢！

大槓桿平台出事勢損穩定

程更計：又花唄、又借唄，究竟係乜唄嚟？

戴孤劃：其實，花唄是中國第一批供消費者日常消費的數碼化無抵押循環信貸產品，借唄則是額度更高的短期數碼化無抵押消費信貸產品，以滿足在支付寶App平台上建立信用紀錄或符合花唄資格的用戶的消費需求。

高　仁：簡單嚟講，花唄、借唄就係做放貸業務，今年首6個月促成嘅信貸餘額達到2.15萬億元人民幣（係2.15萬億，無寫錯唄）！由螞蟻嘅金融機構合作夥伴實際放款或已實現資產證券化（ABS）嘅比例，合計高達98%。勁唔勁？

程更計：換言之，螞蟻只係出咗2元嘅本金，但通過與金融機構夥伴合作槓桿借出100元！？

戴孤劃：據說，重慶市市長黃奇帆也透露過螞蟻的操盤手法，首先以30億元打底，從銀行貸款60億元，令賬面資金有90億元；接着把90億元資產證券化，有了90億元債權用作抵押，再次貸到90億元；最後無限循環抵押近40次，就貸到3000多個億的資金，較原始資金足足放大100倍！真牛逼！

程更計：嘩！中央每一件事情都係要睇安全系數，螞蟻微貸科技平台槓桿咁大，萬一出事會影響到金融同社會穩定。

戴孤劃：呢隻螞蟻亦變成熱鍋上的螞蟻，所以A+H上市也走投無路。

高　仁：各位「巴打」，電影《風雲》亦有云：施主，勢不可去盡，話不可說盡，凡事太盡，緣份勢必早盡。善哉！善哉！

本欄逢周一刊出

如想與高仁交流上市公司的財技個案及招數，請電郵至 [email protected]。

下一篇：	不要讓同事變成聰聰
上一篇：	股市開始反映末季疲弱經濟

文章：