美QE重啟未宜撈底

聯儲局突然減息1厘兼重啟QE，連發兩彈，市場的反應是驚慌而不是驚喜，亞太股市昨天普遍跪低，港股唔例外，恒指最多跌過1190點，收市報23063點，跌969點。

聯儲局明起開會兩日，市場本來就預期減息和重啟QE，但儲局忽然提早行動，連兩日都唔等得，除咗令「好消息盡出」外，也令市場更加恐慌，擔心新冠肺炎疫情在美國造成的影響比預期更大，所以紛紛用腳投票，美股期指在亞洲時段曾跌停板。

雖然提早減息，儲局明日開會仍值得關注，若會後表示有需要時會進一步寬鬆，美國便有可能進入負利率時代（聯邦基金利率目標已降到0至0.25厘）。美國聯邦政府本來就財政吃緊，現在疫情爆發，單係頒布緊急狀態就要準備500億美元，聯邦政府肯定要加碼發債，所以息一定要壓低，儲局也要準備接貨。昨日宣布第四輪QE會購買達7000億美元資產，規模大過第二輪QE的6000億美元，但遠低於第一輪的17250億和第三輪的19900億美元，仲有加碼空間。

全球競相放水，這也難怪，睇吓近期公布的中國經濟數據，就知道疫情對經濟有幾大打擊：2月份內地FDI（外商直接投資）按年大減25.6%；首兩個月社會消費品零售總額按年跌20.5%；全國固定資產投資按年挫24.5%為歷來最差。從中國經驗看，歐美經濟難免重創。放水無助殺死病毒，但有助企業渡過難關，減輕極可能出現的倒閉潮。

中興瀉23% 沽貨為上

水淹地球雖然有助穩定人心，但現階段是否撈底時機就見仁見智。以往績計唔少股份都跌到相當便宜，不過今年至少首季業績唔會好，其後3季如何係一大問號，一切都要睇疫情如何發展。

中興（00763）昨日股價大跌逾23%，據報公司涉嫌賄賂而被美國司法部調查，中興澄清未接獲調查通知，但股價照跌，兩年前的制裁事件歷歷在目，有貨當然先走為上。中興若再被制裁，提防中美貿易、科技戰再度升級，令股市雪上加霜。