熱門:

2020年2月24日

高仁 財圈識真假

一命二運三風水

各位「巴打」與「絲打」,每逢農曆新一年開始,大家都可能會有翻閱生肖運程書的習慣,聽從「峰峰」、「玲玲」、「責責」、「命命」等玄學家指點迷津,在辦公室及家居擺下風水陣趨吉避凶。高仁不是什麼玄學家或風水大師,不可能教導各位「巴打」與「絲打」風水運程走勢,但聽完「豬朋狗友」施友化分享的一個故事後,亦明白什麼是一命、二運、三風水,亦需要靠自己雙手去努力苦拚。

高 仁:踏入鼠年,恭祝施兄有「鼠」(高仁註:普通話發音同「數」)不盡的快樂、「鼠」不盡的收穫和「鼠」不盡的鈔票!哈哈!

施友化:多謝高兄!講到「鼠」不盡嘅鈔票,我有一個朋友嘅外國大學同學,佢真係名副其實有數不盡嘅鈔票,仲可能係「被迫」發達嗰一隻㖭。

高 仁:It's so interesting!Tell me more.

施友化:話說我個friend嘅同學,為保護當事人起見,就叫佢做Peter。佢哋25至30年前喺英聯邦國家一間大學一齊讀會計,但畢業後各有不同嘅發展。我個friend就入咗一間日本人開嘅trading firm做會計,之後公司生意唔好,最後仲執埋笠。Peter就入咗四大會計師樓,做auditor。

高 仁:Peter讀會計,做返本行,又入到Big 4,工作應該都幾平穩。

施友化:本來就係嘅,但佢做到senior嘅位,就決定遞信辭職。

高 仁:(「港女」式問法)點解嘅?

施友化:呢個問題佢老細都有問,Peter話會過檔去一間從事IT嘅公司做CFO,新公司當時正在籌備IPO上市,即使Peter開埋公司名出嚟,佢老細都係唔識。佢老細見Peter平時工作平庸,能力又普通,所以都冇諗住挽留佢,任由Peter離開。

高 仁:莫非Peter去到新公司之後脫胎換骨?

施友化:咁佢都算腳頭好嘅,佢做CFO嘅新公司喺IPO之後反地心吸大,股價一飛沖天,而一眾高管攞咗一大堆平價share options(重點係「一大堆」同「平價」)。

高 仁:睇落佢嘅career path都唔錯。

施友化:查實,我朋友話,Peter好似喺新公司工作初期都有嘗試搵工跳槽,奈何佢本身條件唔係出類拔萃嗰隻,加上對其他行業工種又唔係十分熟悉,一直想走最後都走唔到。

高 仁:咁佢點解會發達㗎?

施友化:最重要原因係佢間新公司業務表現超好,年年業績交足功課有餘,股價坐火箭咁飆升,上市至今累積爆升逾百倍。係100倍!

高 仁:上市IT公司通常都會派share options畀高管㗎喎!

施友化:咪係囉!Peter每年收埋收埋好多options,佢一直想走但又走唔到,加上作為上市功臣要表忠心,佢一直唔好意思去exercise手上options套現,佢亦「被迫」發大達。

高 仁:梗係啦,如果換轉係一個芬man(fund manager)操盤嘅話,一隻股票嘅股價有咁巨大升幅,一早已經走咗貨套現,亦唔會好似Peter咁賺到數不盡嘅鈔票。

施友化:話說回頭,Peter喺新公司做咗咁多年,一直都好努力做好手上工作,只係好運氣逼人而來啫。

高 仁:哈哈!施兄,你又講得冇錯喎。

本欄逢周一刊出

如想與高仁交流上市公司的財技個案及招數,請電郵至[email protected]

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads