熱門:

2020年1月23日

畢老林 投資者日記

道指30萬點 你有命見到

1月22日,周三。美國經濟,隔一段日子,就會遇上難題,然後再過一段日子,動力又會再現,重量級新產品,重量級新公司,一批又一批。儘管如此,投資者向前望,十年,二十年後,總是擔心,到時都唔知乜嘢世界。遙遠的未來,總覺得有好多危機,危機多過商機。儘管歷史數據明明話長線投資,效果昭章,好多人心裏頭,想法卻完全兩樣。

問十個投資者,入市前首先考慮乜嘢,相信十個有九個會答,「個市是否依然有水位」,牛市,擔心會否已經升得太高。換上熊市,投資者又擔心可能有排未見底。不停猜度短期市場走勢,換來的投資成績,究竟好還是壞,自己最清楚。

意見接受方法照舊

最近提過彼得.林治(Peter Lynch)罕有地點名睇好能源股,關心大師選股貼士,自然聚焦在林治關於能源板塊太過殘這方面的分析。大師心得,日前已跟讀者分享。貼士當然最受歡迎,不過簡短訪問中,最值得反覆咀嚼的,反而是另一番話。

"Trying to predict the market is really a waste."林治叫人無謂嘥心機估個市,原因係"Over the long term, the upside is more than downside。"原因係"The market's going to be a lot higher 10 years from now, 20 years from now, 30 years from now..."市場會跌,但總會升番、升凸,然後升凸好多。想想美股十年牛市,期間一直等待一個大跌市的人,所錯失的,遠遠比真正遇上一隻巨熊為大。

困境過後更上層樓

熟口熟面?毫無新意?講嚟講去三幅被?林治並非第一次講,亦並非第一個講。類似忠告,「指數基金之父」博格爾(John Bogle)幾乎傳道一樣,講足成世。股神畢非德亦屢屢提到,自己沒有能力,估計中短期美國經濟與市場方向,但肯定"America's best days lie ahead"。三位絕世高人,都勸人,猜度市場會升還是會跌,毫無意義。三位都屬於所有業餘或者專業投資者的偶像,奇就奇在,大多數人意見接受,投資方法照舊。

有次參觀一個日本二次世界大戰,戰中戰後國民生活變化展,從入口開始到走完一趟展館,好似走入時光隧道,歷時大概20年。大戰期間,後方日本人生活都好難,政府要求人人節儉,因為要為軍隊提供資源。頭髮都唔准電,太過奢侈。食物要配給,另一方面又要練習空襲期間如何保命。戰敗投降初期,展出的圖片中,處處頹垣敗瓦,以及炮火痕跡,居住條件相當差,周圍都有貧民區。

當時如果有人同班日本百姓講,二十年後,日本人幾乎家家有電視機,畀人掟雞蛋柴台,完全唔出奇。誰不知移過兩步,展品開始集中戰後復甦。日本全力投入重建與改革、房屋、教育,方方面面都不斷改善。

有幅家電普及圖,最能顯示日本經濟改善速度與幅度,有幾驚人。上世紀五十年代中,依然好少人擁有電視機,雪櫃以及洗衣機,到六十年代中後期,超過九成家庭有電視,八成有洗衣機,六七成有雪櫃。從一無所有,到三大家居神器齊備,大概二十年。只要有足夠時間,經濟成果通常超過一般人預期。就算日本當年搞到咁大鑊,都沒有例外。同樣地,大鑊嘢,美國自身亦克服過唔少。

畢非德在福布斯百歲大壽酒會上指, 道指大有機會一百年後越過100萬點(其實不過需要每年8.8%複合增長)。百年太長,你我都無緣見證,但道指30萬點,以同樣增長速度,只需不到30年,今日的大部分投資者都有機會目睹。道指離3萬點不遠,美股短期是否已經太貴?可能係,亦可能唔係。無論如何,比較30萬點,蚊髀同牛髀。

重點在個Keep字

聽林治講,要贏錢,好簡單。"If you keep putting money in, in 5, 10, 15,20, 25 years you should do well."習慣固有炒法,改變的確好難。徹底改變,無能為力的話,不如嘗試撥出10%資金,試試大贏家的做法。一買就跌,點算好?冇人叫你一鋪瞓身。除非你已經七老八十,否則來日方長,分段入市,升繼續買,跌亦繼續買。投資是場馬拉松,重點在個keep字。

正如林治強調,個市一定有時會跌,你無法確定when or why。既然如此,何必希治閣上身,過度緊張?

 

(編者按:畢老林最新著作《我的投資日記》現已發售)

歡迎訂購:實體書、電子書

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads