2019年9月30日
各位「巴打」,上回談到,高仁與「豬朋狗友」揭開上市公司供應鏈融資財技嘅秘密後,貴為多家香港上市公司大股東的戴Sir,想了解金融機構輕易受該財技欺騙的原因,以及有關大股東的背後真正目的。本文,高仁與「豬朋狗友」將帶領各位「巴打」,一起識破瞞騙金融機構融資的手法。
高 仁: 各位「巴打」飲完茶、食完包,大家可以繼續BMW。
戴孤劃:BMW?這是什麼?
高 仁: 哈哈!唔好意思,我慣咗用行業術語。BMW係Blow Much Water嘅簡稱,即係吹水嘅意思。
程更計: 講番正題,呢家上市公司供應鏈融資財技之所以work,因為佢成功創造咗多方共贏嘅局面,一係電商平台雖然被不斷利用作為中介體,但銷售額亦水漲船高;二係上市公司又買又賣又回購,產品不斷循環操作谷大貿易合同,兼且創造大量應收賬款憑證,可以向金融機構獲取更大額嘅供應鏈融資貸款;三係金融機構揭發上市公司財技之前,批出更多貸款無疑可以賺取更多利息。
「三流合一」審核做好個開頭
戴孤劃: 但是,為什麼上市公司可以輕易獲得金融機構的供應鏈融資貸款而沒有被抓到,金融機構不是都有風險管控程序的嗎?
高 仁: 因為內地金融機構批唔批出呢類型供應鏈融資貸款,主要睇應收賬款憑證、採購合同、發票等資料齊唔齊全,即係商品流、訊息流同現金流(即所謂嘅「三流合一」)能否實現,但就未必會查證供應鏈嘅產品賣方、最終買家是否存在關聯交易,令到上市公司有機可乘。
戴孤劃: 內地人最講求關係,雙方建立好關係,事情自然就好辦。不是嗎?
程更計: 上市公司當然明白雙方建立信任關係嘅重要性,亦洞悉到金融機構嘅風險管控流程往往係先緊後鬆,對於金融機構嘅合同面簽(雙方面對面簽訂合同)同雙錄(錄音錄像)要求,上市公司最初一定會循規蹈矩跟足程序,提供完整真實嘅產品流向、採購合同以及應收賬款憑證,畀金融機構職員嚴格逐一審核「三流合一」,務求做好個開頭。
旨在注入殼股炒高獲利
高 仁: 當整個循環操作系統上咗軌道之後,呢家上市公司再向金融機構申請供應鏈融資而可能被要求合同面簽同雙錄等程序,呢家上市公司就會利用特殊關係喺大型電商平台租用辦公室,之後假冒買賣雙方簽訂採購合同及應收賬款憑證,從而瞞騙金融機構職員。
戴孤劃: 雖然上市公司利用金融機構,在供應鏈金融風險管控流程的漏洞可以套取到巨額資金,但公司構建的供應鏈金融業務體系必然面臨虧損,到底大股東有什麼背後目的?
高 仁: 戴Sir果然係最關心大股東嘅諗法,佢嘅目的係想喺資本市場食大茶飯,從而賺取更高嘅收益。據了解,呢家上市公司之前收購咗其他上市公司,大股東打算將呢個供應鏈金融業務注入後者,期望提高上市公司業績同股價去獲取資本市場巨額收益,就可以填補到體系內嘅巨額虧損。
程更計: 最唔好彩嘅係,金融機構識穿咗呢種騙取供應鏈融資嘅手法,呢家上市公司停牌兼面臨爆煲,到而家都仲未知道點樣收科。
戴孤劃: 鐵哥們,這個手法那麼危險,你們就不用教我啦!
高 仁:哈哈!我哋同各位「巴打」分享下嘛。
易容財技系列.之三
本欄逢周一刊出
如想與高仁交流上市公司的財技個案及招數,請電郵至 [email protected]。
訂戶登入
下一篇: | 孖展新指引 扼殺中小券商生存空間 |
上一篇: | 黃金購買力趨飽和 調整機會大 |