2019年8月9日
8月8日,周四。兩日唔夠,亞太區4個國家相繼減息,紐西蘭、印度減幅較市場預期大,泰國則4年來首次調低利率,連菲律賓都唔執輸,周四加入減息陣營。眼見咁嘅形勢,侵侵點會唔乘機向鮑公發炮,催逼聯儲局減多啲、減快啲?
愈是這樣,市場便愈心慌,美國10年期債息周三晚一度跌穿1.6厘,跟2016年歷史低位已相差不遠,金價則連千五美元都升穿埋,與債息的逆向關係和日圓的正向關係很明顯,反而美滙指數始終只是橫行,擺脫不了在97至98區間內上上落落的格局,沒什麼真正方向可見。
記得2016年英國公投得出脫歐結果後,市場避險情緒高漲,資金一窩蜂湧入債市,全球負孳息國債總額高達13萬億美元。以為數值見頂,豈料3年過去,負息債規模沒有最大只有更大,今天已逾15萬億美元。
老畢原先以為,環球國債孳息率2016年已見了大底,之後雖會上上落落,但美國10年息1.3厘這些水平,至少十年八載內不會重現。
美債也負息?
美國10年息係就係仲未「到位」,但除非有重大消息足以扭轉市場情緒,否則2016年的歷史低位恐怕守唔得幾耐。債券大行PIMCO環球經濟顧問Joachim Fels便說,聯儲局一旦被迫重啟量化寬鬆(QE),美債孳息率見負數只是時間問題。
很多人都覺得奇怪,明知蝕硬,何解負息債都咁多人吼?避險、通縮預期、機構投資者不得不買當然都是理由,但冇人用槍指住你個頭逼閣下持有至到期,債息跟債價反向而行,息跌則價升,只要有人願意以更高價格lock死更低嘅yield,把債券賣出就有錢賺。
Momentum chasing
今天ETF盛行,債當股炒完全冇難度,追蹤美國長債價格的iShares Barclays 20 + Year Treasury Bond ETF(代號TLT)就有無數粉絲。債息所以跌得那麼快,有幾多真係因為基本因素、恐慌情緒,有幾多可以歸因於momentum chasing,話唔埋也。
關於這個現象,舉個例大家就好易明。歐羅區成員國奧地利30年期國債孳息率目前約0.25厘,未到負數,但持有30年接近零息,聽落好老襯。然而,如果閣下一年前買今天走,利潤超過六成!這也許是個比較極端的例子,惟債市發生何事,單看此例已可思過半。
問題是,利率去到今時今日嘅水平,債當股炒要長賺長有,等於寄望孳息率沒有最荒謬只有更荒謬,只要世界正常番少少,本金面對的風險可以好得人驚。假如真係咁「唔好彩」,債民揸住嘅係不見得比現金安全,兼且無息甚至負息的投資工具。
Downside大過upside
低通脹低利率也許真的已成為長期趨勢,但息率由10厘降至零,不等於可以在跌穿零後一直踩落-10厘。買負孳息債券博一年賺六成,無異於賭債息愈負愈深。唔敢話冇可能,但downside點都大過upside,玩唔過也。
(編者按:畢老林最新著作《我的投資日記》現已發售)
歡迎訂購:實體書、電子書
放大圖片 / 顯示原圖 放大圖片 / 顯示原圖
訂戶登入
下一篇: | 期指僅技術性反彈 |
上一篇: | 香港股市上日收市統計 |