2019年7月16日
面對上半年中美交惡,內地次季經濟增長升6.2%,符合預期,但老外起哄「阿支阿左」,標題只瞄準GDP季度增長創1992年以來最低,好彩未有嚇散大市。
中國人口現挨近14億,單是數人頭已是地球村之冠,經濟體系亦屬全球第二大。無可否認次季GDP增長比首季減慢0.2個百分點,但仍遠比其他發達國家好。況且面對美國總統特朗普「吹雞」圍堵中國,內地靠「三頭馬車」(固定資產投資、零售與工業)頂住,上半年GDP仍有逾6%增長,表現已相當不俗。
好彩昨日港股用行動證明市底硬淨,早上開市後無厘頭急插400點,但內地公布數據後即大逆轉,收市倒升83點,從低位計勁彈483點,成交只得713.7億元。考慮到芬佬暑假例牌抖暑,連同內地科創板亦抽乾部分資金,港股成交奀可以理解,何況50天線(28057點)再展韌力,後市毋須過悲。
全球經濟表現低迷,央行唯有搞白鴿起義,一句講晒就係息率劈得快好世界,紐西蘭、澳洲及印度央行先後減息,歐洲央行有意換入女白鴿掌門拉加德(Christine Lagarde)接替德拉吉(Mario Draghi);美國面對非農數字靚爆鏡,失業率又低企,但特朗普威逼下,聯儲局主席鮑威爾上周在國會聽證會亦只能放鴿。
各國央行跪低,惹來愈來愈多債券孳息率由正變負,負孳息率的債券市值規模亦變大,由去年10月不足6萬億美元,不足一年何止翻一番,更一度突破13萬億美元,到近期有所回落,截至昨日為12.2萬億美元。
債市嚴重扭曲,全球進入減息周期,特朗普也要力爭連任,投資者睇死央媽包底,股市又點會閉翳?難怪美股三大指數齊破頂,道指、標普500指數及納指由7月起到上周五分別升2.8%、2.5%和3.6%。美股三大指數創新高,但唔好以為美股每條戰線都殺得性起,以中小型股為主的羅素2000指數為例,由7月起到上周五僅升0.2%,不單跑輸傳統美股三大指數,亦與歷史高位相差近一成。
睇埋美股三大指數市寬,道指、標指及納指成分股升穿50天線比例分別為90%、85.7%及86.4%,相反羅素2000指數只得61%成分股企在50天線上,即大價股走勢比細價股佳。喺市場極度分化的年代,揀大股依然遠比細價股好。
訂戶登入