熱門:

2019年1月11日

畢老林 投資者日記

經濟資產化

1月10日,周四。資產市場有所謂財富效應,老畢最近時常在想,到底是股市影響經濟多一些,抑或經濟影響股市多一些。大蕭條是由1929年華爾街股災直接觸發的;2001年美國經濟衰退,罪魁禍首也是科網泡沫爆破股市暴跌。可是,1987年的股災卻並未引發經濟衰退,恐慌過後,一切如常。

唧都唔笑放鴿

去年第四季前,強如美國上周五公布的去年12月份就業數字,對股市未必是佳音,因為投資者怕加息怕得要命,31.2萬個新增職位(市場預期17.7萬個)、3.2%工資增長(2009年以來最大按年升幅),連失業率回升都是求職者增加有以致之,如此醒神的就業報告,想雞蛋裏挑骨頭都冇骨頭畀你挑。問題是,市場馬上就會想到聯儲局加息絕不手軟,股市不升反跌一點不奇。

第四季後,投資者好像集體「撞邪」,驚衰退多過驚Fed,美股一係唔插,一插就插到見「熊」。美國上月就業數據靚到無話可說,雖是滯後指標,惟以事論事,點睇都唔似市場想像般衰退近在眼前。

不知是否因為有這份報告壯膽,美股踏入新的一年定番好多,至少唔會密密咁單日轉向。更重要的是,次次上鏡唧都唔笑的聯儲局主席鮑威爾,在就業數據公布當天講了一番市場好啱聽嘅說話,表明對加息大可保持耐性,仲慌死你唔收貨,加多句若然有需要,政策立場都可以變。

放鴿放到咁白,你話聯儲局唔驚個市繼續冧,開玩笑吧?睇埋隔晚公布的12月議息紀錄,就更加可以肯定,決策者着眼股市對實體經濟的影響,投資者則關心自己的荷包,但對個市一樣咁敏感。

點計都計唔清

看近一點,香港人最在意樓市,樓價升班官驚市民上唔到車,樓價跌又怕通街負資產,真的左右做人難。資產價格與經濟的關係有啲似雞同蛋,邊個帶挈邊個,邊個連累邊個,點計都計唔清。

老畢剛看了《華爾街日報》一篇幾有啟發性的文章,發現美國經濟榮辱跟股市底氣關係愈來愈密切。沿此路進,即使冇侵侵指手畫腳,聯儲局決策都不可能唔考慮市場因素。

話說,美國人今天持有的股票、債券、存款等金融資產,總值相對名義(nominal)GDP處於歷來最高水平(4.35倍)【圖】。就同香港磚頭一樣,美股、美債有乜冬瓜豆腐,經濟好難有運行。講緊嘅雖然都係股市下跌削弱消費信心、悲觀情緒彌漫推高企業借貸成本,但10年前美國人持有的金融資產,總值相對GDP只有3.4倍,今時今日高達4.35倍,牽涉的金額自然不可同日而語。

 

冇聽過冇睇過

香港如果唔係咁多人心甘情願讓青春被500呎縛住,波叔何須為應否放寬按揭成數思前想後?在美國,高管新酬與股票掛鈎,打工仔積蓄又跟401(k)一類退休投資計劃榮辱與共,唔使幾耐,只怕連字典都可以搵到equitized economy這個詞。

美股順風順水,聯儲局班policymakers會好理直氣壯咁話,一切按經濟數據辦事;個市一旦倒轉嚟行,話之你就業報告幾省鏡,也懶理鮑威爾先前講過利率離中位水平好遠定好近,更毋須介意點陣圖預示美國今年加息多少次,投資者一於當冇聽過、冇睇過算了。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads