2019年1月7日
港股上周五先挫後勁升,恒指收市報25626點,大升561點,一周累升121點,日線圖陰陽燭出現早晨之星,有望以雙底延續反彈浪,50天線(25888點)和100天線(26486點)是短期阻力所在,前熊市低位24540點則是重要支持。
人行上周五收市後宣布分兩次降準合共1厘,唔怪得股市大升。本欄早前已預期內地今年會放水,但估唔到一過年就開水閘,而且一降就係1厘,計及其他因素,淨釋出資金約達8000億人仔,即使唔算大水漫灌,也不能算是細水了。
大手筆降準,對股市當然有一定刺激,問題係刺激能維持多久。歷史數據就唔係太樂觀,2008年至2018年人行降準13次,降準後下一個交易日A股升市有5次,下跌的則有7次。其實急急大開水閘的背後訊息,就係經濟比想像中更差,所以今次降準對中港股市的刺激估計唔會太長,遑論由熊轉牛。
美股上周五亦喪升,道指單日上揚3.29%,納指進賬4.26%。聯儲局主席鮑威爾放鴿,強調對利率政策會保持耐性,更最重要的一句話是縮表若在金融市場引發問題,儲局將決斷地調整縮表步伐。同日公布的就業數據強勁,亦送美股一程。
中美今起就貿易戰展開談判,90天休戰期大約剩番50日,仲有時間討價還價,今次未必有重大成果公布。不過正如早前所講,「侵侵」同習大大都有停火的需要,最終達成協議的機會不低,然而「侵侵」翻臉如翻書,就算有協議,都唔代表從此天下太平。
估值吸引支撐股價
降準、美股狂彈,加上貿易談判展開,中港股市短期有機會續彈,早前因擔心經濟下行而急挫的資源股或有短炒機會,馬鋼(00323)可予留意。馬鋼2018年首三季盈利倍增至55.83億元人民幣,全年一定唔會差,雖然今年增長預期大幅放緩,但往績P⁄E為5.2倍,預期P⁄E隨時得3倍,估值低可支持股價。
以走勢論,馬鋼上周五低開後以陽燭高收,單日轉向,9RSI、MACD同STC都出現底背馳,有望反彈,短炒目標3.50元至3.70元。
放大圖片 / 顯示原圖
訂戶登入
下一篇: | 傾生意竟緊要過有瓦遮頭 |
上一篇: | 恒指頭肩頂後抽 月線烏雲蓋頂尋底 |