熱門:

2019年1月3日

畢老林 投資者日記

2019年要學懂picky

1月2日,周三。2019年首個交易日,恒指落筆打三更,一開波就大插715點,認真大吉利是。港股會唔會好似某些分析師所講,新的一年先苦後甜?留番年尾感性回顧時先講都未遲。此刻收拾心情要緊,得認真睇睇難玩的2018年究竟為投資者帶來什麼啟示。

天方夜譚都有人信

猶記得,美股大牛期間,市場每見風吹草動,總有人撲出來警告,新的危機迫在眉睫!結果如何?一個二個變咗「壞鬧鐘」,畀人笑足10年囉。此輩去歲終於「威番次」,惟就像美國財長努欽好做唔做急Call賓架查問資金狀況一樣,股市暴跌可以有很多原因,唔係鑊鑊都可以入銀行危機數。

要知去年股市何以輸死人,方法其實好簡單,只要細心想想,與金融海嘯以來任何一年比較,2018年特別在哪裏?中美貿易戰確實起了推波助瀾作用,但市場開始感受到流動性逆轉的殺傷力,我看才是底因。

在美、中、歐、日央行開盡水喉期間,即使閣下堅決否定QE與資產價格大漲存在因果關係,也應張開眼睛看看現實世界發生何事。

點解香港咁多父母陪班八九十後仔女癲,義無反顧幫佢哋上車買納米劏房?一句「樓價只升不跌」,足以解釋一切矣。美國科網龍頭連續幾年股價雙位數compound落去,投資者非但唔覺瘋狂,反而對公司市值不用多久便大過美國GDP信到十足。

咁嘅說話點解都咁多人buy?流動性泛濫期間,安全資金冇回報甚至負回報,央行買債壓息,最大贏家唔係政府債券,而係股、樓、垃圾債、Bitcoin乃至名畫藝術品。投資者勇於冒險,風險資產自然就會水漲船高。市場嘅嘢,幾時都係price決定narrative,只要有價有市,天方夜譚都有人信。

搵個毫子刮沙都冇

在鐘擺的另一端,去槓桿、縮表、停止放水,不論以什麼字眼出之,代表的都是量化寬鬆結束。美股升市在第10年斷纜、香港樓市湧現劈價潮、科網巨頭遭洗倉,這一切都發生於2018年,你認為純屬巧合嗎?潮漲變潮退,首當其衝的乃風險最高資產,但即使保守如香港政府推出的終身年金,近萬市民表明認購意向,最終竟有四成人「縮沙」,何以如此?

老畢對年金(annuity)這種理財產品並無偏見,大家記性好該有印象,在下曾打過這麼一個比喻:老徐於投資一道較老畢精明,退休後單靠個「倉」便能好happy咁生活到八張幾嘢。我就麻煩啲,七張幾已望天打卦日日發愁。問題是,老徐不過比老畢風流快活多幾年,等我同佢都九張嘢那天,咪一樣齊齊坐公園你眼望我眼,搵個毫子刮沙都冇?

年金的一大作用是對沖年老時沒收入卻又行得走得的風險,不宜單純地以回報角度衡量其投資價值。可是,你不能阻止潛在認購者着眼回報貨比三家,最後作出在他們眼中理性的選擇,包括打退堂鼓。

退一步說,長者揸住一兩球,樓當然買唔到,就買個車位收租吧,惟回報勝得過已重見兩厘的銀行一年定存嗎?就連美國三個月國庫票據孳息率都接近兩厘半,高過標普500指數股息率,可見流動性收緊、利率正常化,不論股票等風險資產還是annuity一樣的保守投資,其實都在爭奪買少見少的資金。以往被視為吸引的條款和估值,現在已引不起投資者興趣;一兩年前起碼有半數人相信的神話,如今已集體破滅。資產價格要冧,何須係又金融危機,唔係又金融危機?

講咗咁耐,老畢是否在告訴大家, 2019年什麼也不要做,一於「現金為王」當策略?睇過昨天拙作〈誰是長線貶值王?〉的讀者,當然知道老畢唔會自打嘴巴咁矛盾。

在下的看法是,今年投資者會好奄尖好picky,再冇人輕信Amazon遲早壟斷各行各業,今天三位數市盈率唔單止唔貴仲「筍」到無倫一類論調,反而會非常在意企業如何賺錢,對盈利能見度及派息穩定性要求愈來愈高;簡而言之,就是把基本因素提升至極重要的位置。

資金配置更有效率

潮漲誰也能賺錢,潮退就要考考股民功力。這其實利多於弊,資金配置更有效率,從2019年開始!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads