2018年11月27日

畢老林 投資者日記

天降橫財買乜好

11月26日，周一。毫無疑問，2018年乃搵食艱難的一年。《有米落鑊》欄主阿米上周六於其鴻文中有言，今年是收水元年，經歷過科技股洗倉潮，平錢不再殺傷力有多大，被打得滿地找牙之輩無不深切體會。空口講白話當然「現金為王」，但股債金滙瓣瓣坐艇時應該怎樣處理，只有阿米兄一類在市場浸出真感覺的人，方能說出身處困境同道一聽便能產生共鳴的話來。

感恩節後聖誕又到，確實應該take a break鬆一鬆。早兩日，老畢在Twitter上看到美國前眾議員、曾兩度角逐共和黨總統候選人提名的保羅（Ron Paul）發帖。這位一直主張恢復金本位制的退休政客開了一道投資題，但凡眼見即可回應。今天既然講開現金為王，不妨當作思想實驗（thought experiment），陪這條資深金甲蟲癲埋一份。

問題是這樣的，假設一位有錢親戚向閣下贈送一萬美元，但要滿足兩個條件，「禮物」才歸你所有：一、10年內不能動用；二、在4項資產中任擇其一，並持有10年，揀好了不容轉換。4項資產分別為：美元現鈔、黃金、比特幣，以及美國10年期國庫債券。

大家自然會問，「菜單」上連Bitcoin都有，何以獨缺股票？金甲蟲做嘢一係有自己嘅理由，再唔係就根本毋須理由，看官既然選擇回應，諗清諗楚四揀一要邊樣便是，唔熟性駁嘴駁舌，老人家會好唔高興。

在下發現帖文時，遊戲已結束，想玩亦來遲一步。那不打緊，結果不用更新反而仲準。在接近9.5萬個回應中，最少人選擇的資產乃美元現鈔（2%），接着由尾數上為美國10年期國庫債券（11%）、黃金（37%）和比特幣（50%）。換句話說，虛擬貨幣個煲雖然爆咗，但很多人對Bitcoin重振雄風、10年後又是「一條好漢」滿懷憧憬，否則怎會多達半數回應者揀比特幣揸足10年？「信仰」嘅嘢就係咁神奇，Bitcoin能否發展成獲廣泛接納的支付媒介冇人知，惟此刻肯定「非必需」（non-essential），即使最終能實現這個目標，Bitcoin在眾多虛擬幣種中是否真的能跑出，在加密圈中地位無可取代，同樣考起。

買Bitcoin當押注冷馬

咁即係話，比特幣10年後每枚過百萬美元又得，一文不值亦得。橫豎筆錢親戚送，同天跌落嚟冇分別，大不了當從來沒見過這一萬美元。「信仰」以外，相信唔少人會同自己講，以押注冷馬的心態買Bitcoin博一博，why not？

最多人揀的講完，輪到最少人選擇的美元現鈔。若非Ron Paul開宗明義，「禮物」10年內不能碰，老畢相信選擇現金的回應者必然遠多於2%。天降橫財花得特別爽，老徐夜馬有斬獲都會第一時間請我這個朋友仔宵夜，咁好彩有個富親戚無緣無故醒你一萬美元，不拿來大吃大喝裝身旅遊，咪好對唔住自己？

既然老人家話到明10年內不能動用，而投資什麼還得買定離手不可轉換，回應者隨即就會想到，10年流流長，齋持現金乜都唔做，等於任由購買力年復年給通脹蠶食。有得揀嘅話，誰會那麼笨？

現金為王的真諦

所謂現金為王，意思不過是投資市場望上去一片朦朧，多持現金有利謀定而後動，唔係叫你坐住大堆茄殊當寶。老畢看過一項統計，發現1926年以來，美國股債同年雙雙錄得負回報，唯有現金（或等同於現金的資產）能提供正回報的案例，合共只出現過兩次（1931年及1969年），在全部92年中佔比僅2%。大家從選擇未來10年揸茄殊的比率同樣只有兩個巴仙，便知98%回應者明白「現金為王」的真諦。

Bitcoin當冷馬買，現金不能用更不能儲，剩下來的黃金及美國10年期國庫債券，換着你會點揀？各位可能會估，若問老畢，佢一定選金。我承認以往曾是金甲蟲，而與黃金談戀愛談足一世的Ron Paul，眼見選擇未來10年揸金的回應者多達37%，相信亦心滿意足收貨有餘。然而，依足老人家所定條件二擇一，我會揀美國10年期國庫債券。

大家也許覺得，今時今日美國3個月票據孳息率都講緊兩厘半，10年債息才3厘多一點，為何要選後者？唔跟Ron Paul規矩，條數當然係咁計，但依足老人家意思，你就沒有自由選擇資產的靈活性。如果有得揀，10年咁長點解唔買股票？

四揀一長債跑出

在戰亂或惡性通脹時期，黃金的保值功能早已歷經歲月驗證，自然唔似Bitcoin咁兒戲，但黃金也是一種faith-based資產，談不上什麼基本因素，攞嚟炒OK，長揸若可以發達，老畢就唔會因過去10年供黃金資產唔供S&P 500基金，一直後悔到而家。衰就衰在，「信仰」一旦有咗，好難話戒就戒，在下不停止相關投資計劃，主要還是捨不得情意結話斷就斷。當真重頭嚟過再戰10年，假設Ron Paul的預設條件不變，老畢就不會揀金了。

美國政府債務違約機會微乎其微，真的發生，有全世界陪你死，豈非與有榮焉？要諗嘅反而是，喺3厘水平lock實個yield坐足10年，會不會低估通脹因而蝕章？不過，假如剩下來的只有比特幣、黃金和現金3個選擇，那麼risk-adjusted也好，inflation-adjusted也罷，四揀一哪項資產最合理，答案呼之欲出矣。

 

放大圖片 / 顯示原圖

下一篇：	營運效益改善 風電業漸復甦
上一篇：	香港股市上日收市統計