撈工建行勿心急

港股復市上演高台跳水，恒指暴挫662點收市，報27126點，一支光頭大陰燭插穿10、20同50天線，9月12日以來的短期升軌也失守，反彈浪能否延續頗成疑問。這一浪反彈由26219升至28031點，若調整0.618倍，26911點有支持；另一支持是9月13日的上升裂口（26468至26648點），如果兩關皆失，反彈便好大機會夭折。

正如昨日所講，大市技術上雖有條件續彈，但近日的消息並不配合。中國9月份官方製造業採購經理指數（PMI）同中國財新PMI均遠遜預期，令人擔心內地經濟倒退。外圍意大利國債急瀉，以及印尼盾兌美元昨日跌至亞洲金融風暴以來新低，均令投資者大感不安。

美加貿易談判傾掂數，對美股係好消息，但對中港股市就唔係咁好。侵侵搞掂北美，下一個輪到日本，相信安倍會投降。歐盟比較麻煩，但都只係「人民內部矛盾」，最終妥協機會大過反枱，到時中國在貿戰中更為孤立。

更壞的消息是一艘美艦星期日開入南海，中國派艦進行識別查證，兩艦最短相距僅41米，幾乎「擦艦走火」。與此同時，美國有前將官建議把2020年的環太平洋軍演在南海舉辦，以挑戰中國對無人島礁的主張。

筆者一直都話，中美之間打的是地球爭霸戰，係「敵我矛盾」，唔易妥協，貿易戰只係開端，中國頑抗不屈，唔排除衝突擴大至其他層面，包括南海。

再跌一成始吸引

昨日幾乎所有板塊都跌（連大強勢的油股都要倒跌），內地金融股係重災區之一，平保（02318）跌2.77%，太保（02601）插2.98%；工行（01398）勁跌3.32%，建行（00939）也挫3.2%。內地經濟睇淡，加上內地樓市轉勢有兆，內銀好難有運行。

截至去年底止，工行每股資產淨值7.157港元，建行8.54港元。以昨日收市價計，兩行的P⁄B都係0.77倍左右，息率約5.2厘，估值略為偏低，但唔算好抵買。

如果兩行股價再跌一成，P⁄B回到7倍，息率上番去5.8厘左右，同滙控（00005）睇齊，條件先至叫做吸引，有心長線投資內銀，唔使太心急。

放大圖片 / 顯示原圖

下一篇：	期指回穩還看20天線
上一篇：	天涯何處不淪陷

文章：

— 邱古奇

更多...