《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年9月7日
港股跌勢意猶未盡，恒指昨日低位26818點，跌穿前低位26871點，再創熊市新低，收市反彈至26974點，跌269點。大勢向淡無疑，不過恒指兩日跌成千點，吊頸都要唞氣，短線反彈唔奇，不過27250點至27550點阻力不輕。
利淡因素依然係貿易戰、新興市場危機、加息同內地經濟轉弱等。呢幾個因素炒咗一段時間，仍在發酵中，利淡作用有排未散。以新興市場為例，據彭博報道，原來新興市場股市已下跌了222天、滙價跌155天、政府債券跌240天，創下2008年金融海嘯以來最長的拋售期，天知道仲要跌幾耐。
先平掉恒大Long Put
今次新興市場危機最主要的一個因素係美元強，雖然侵侵討厭美元強，但佢老人家到處點火製造紛爭，加上聯儲局加息收水，資金避險，都由新興市場跑去美國，如此一來美元資產日強，新興市場股滙債則日跌，愈跌資金愈走，造成惡性循環，實在唔易收科。
早前累積的股票期權淡倉，都有四五成以上利潤，個別先食糊，昨日先平中國恒大（03333）Long Put，畢竟佢有補派股息支持，而且倉內也有碧桂園（02007）淡倉，內房淡倉唔使揸咁多。
昨日新開淡倉的是友邦保險（01299）。友邦絕對係強勢股，恒指1月尾見牛市頂，友邦5月仲可以創新高，跟住連跌3個幾月，都只係由高位回吐14.7%。不過在熊市中，強勢股往往最後才跌。
睇走勢，友邦短期內好大機會補跌。6月中以來，友邦在62.5元至70.1元之間上落，昨日以陰燭跌破上落區，仲要2017年初以來首次跌破250天線，100周線大約在59元，可作為下跌目標。
友邦中期業績其實不太理想。由於年結日由11月30日改為12月31日，所以早前公布的中期業績係截至6月底的7個月，期內賺22.28億美元。若按6月底止的6個月計，友邦純利16.62億美元，按年大減48.72%。此外，期內新業務價值19.54億美元，按年增長22%，較市場預期低1個百分點。績後多家大行把評級由「買入」降為「中性」，即係比較好聽的「沽售」。
放大圖片 / 顯示原圖
訂戶登入
| 下一篇： | 資金本身是指標 |
| 上一篇： | 支持位26768點 不容有失 |
