熊二反彈如此短癮？

港股於期指結算日下跌，恒指收市報28164點，挫252點，日線圖出現光頭大陰燭、「穿頭破腳」利淡訊號，50天線（28289點）得而復失，要小心了，本周一的上升裂口（27830點至27956點）若全數回補，就要提防反彈完結。

從技術上睇，恒指由33484點瀉至26723點，累挫6761點，跌幅達兩成，出現熊市二期反彈好應該，以黃金比率計，反彈0.236倍係最低消費，較常見的是反彈0.382倍或0.5倍。昨日高位28533點，只係稍高於0.236倍目標28318點，如果熊二反彈就此完結，這個反彈未免太弱了。

內地形勢不利特朗普難收手

港股反彈受阻有三大原因，第一是美國對2000億美元中國貨加徵關稅的聽證程序剛完成，雖然商家大力反對，但難阻白宮一意孤行。預計下月6日將確定徵稅名單，跟住好快就推出。

今日已經係8月尾，得番一個禮拜，有冇奇蹟出現？美墨已就貿易關稅傾掂數，加拿大大概亦會屈從，中國在談判中變得孤立，形勢更為不利，特朗普點會在此際收手？

其二是新興市場貨幣又現危機，繼土耳其之後，阿根廷披索近日失速下跌，央行狂拋外儲都頂唔住；印度因經常賬赤字惡化，印度盧比兌美元前日跌至歷史新低。面對如此境況，投資者會否Risk On？

其三關乎香港本身，金管局差不多隔日就接港元，銀行體系結餘已降至760億元。在不足3年前，結餘超過4000億元創新高，水浸香江，所以美國加息香港可以唔跟，但不知不覺間已經走資超過3000億元，雖然760億元仲算充裕，但難保唔會再跌落去。香港樓價貴絕全球，其中一個主要原因係錢多息平，如果呢個利好因素唔再存在，後果會點？

在熊市中，即使短線博反彈，始終都要有淡倉睇門口。散戶造淡大市，保守的可以買南方恒指反向ETF（07300），冇槓桿，風險有限。另一個方法係Long Put盈富基金（02800）股票期權，又或Long Put恒指期權，有槓桿，也有機會輸晒，要控制注碼。風險承受力夠強的，可吼反彈市沽一兩張細期，個個月轉倉，直至熊市結束為止。

放大圖片 / 顯示原圖

下一篇：	誰說空置反周期
上一篇：	標普納指續新高恒指穿頭破腳恐轉勢

文章：

— 邱古奇

更多...