2018年8月31日
桐成(01611)因為畀火幣收購,復牌後勁升一倍,但相信唔會開心得太耐,要將火幣放入上市公司,難過登天。有先例可循,你睇品牌中國(00863),虛擬貨幣生意賺大錢,唔代表可以順利裝入上市公司,尤其而家香港對殼股嘅敵視態度,唔好話係一盤咁受爭議嘅生意,普通嘅傳統生意,晒士大少少都唔畀你過關。香港本來係動腦筋嘅地方,係發揮財技手法致富嘅寶地,惟時移世易,現在只歡迎你做大一盤蝕錢生意上市,香港要做一個來者不拒嘅IPO基地,以IPO股票出售數量作為業績指標。
唔好怪香港人愈嚟愈蠢,愈嚟愈冇創意,香港唔鼓勵你用腦,只容許你學人家騙財。
阿根廷貨幣貶值,政府大幅加息15厘,而家阿根廷嘅利率係60厘。新興市場貨幣貶值危機聽起嚟好恐怖,但對世界富裕國家嘅生活又唔見得有影響,只係局部某幾個國家要勒緊褲頭。阿根廷貨幣貶值、債務違約,要IMF出手相救唔係第一次,以往幾次你都冇感覺。今次係委內瑞拉、土耳其、阿根廷、巴西一齊唔掂,當地貨幣急速貶值,出現經濟危機,可見調控一個國家嘅貨幣政策係高難度動作。
阿根廷本來同香港一樣,行貨幣發行局,同美元掛鈎,直至2002年,貨幣發行局是外判了貨幣政策,例如香港就係要跟隨美國嘅貨幣政策。阿根廷自己亂搞一通,搞到而家貨幣冧檔。
香港要跟隨美國,既然美國要縮表,香港外滙基金都要縮表。銀行結餘減少,即係外滙基金負債減少,貨幣基礎減少,資產負債表收縮。但銀行結餘減少未必等於資金流出香港,亦唔等於香港貨幣供應同步減少,唔好聽見新聞話結餘跌穿800億就覺得好似香港冇錢。
香港資金流動咁自由,錢銀出入係好平常,亦因為資金咁自由,香港先有今日嘅地位,有錢人明知買貴貨,都要嚟買樓買上市公司。如果香港落閘,唔畀外人買樓買股票,香港即時學似阿根廷,貨幣大跌,保證冇人有興趣買港紙。火幣買殼,正因為內地嚴打,先走嚟香港搵機會。
若果買殼活動完全封殺,唔畀任何人動腦筋善用香港資本市場,咁就迫全香港人唯有走去買樓。
放大圖片 / 顯示原圖訂戶登入
下一篇: | 打大佬要有冒死的精神 |
上一篇: | 侵侵遭彈劾美股會冧? |