2018年8月30日
最近一手盤開賣,發展商唔敢開價太進取,一樣賣得七七八八,買樓嘅人冇因為加息在即而停止買樓,可見並非全部人都在等樓價跌。事實上,超低息環境過後,下一個就係低息環境,從超低息開始加息,唔會一下子變成高息。供款從來唔係買樓最大難關,首期先係,除非按揭成數進一步降低,否則加半厘息唔會消滅買樓意欲。
反而發展商為求去貨,使出先住後付嘅優惠,畀一兩成樓價就可以入住,3年後先成交,令買樓嘅人更多。實力唔夠嘅人陸續可以入場,劏房盤愈劏愈細兼供應漸多,居屋又減價出售,用盡身家千方百計入市買細價樓嘅市民最危險。萬一有人因貿易戰而失業,佢哋隨時係最受樓市逆周期影響嘅一群。
前香江第一能吏話要扭轉樓價只升不跌嘅迷思,更加話要將樓價拉番落合理水平,佢而家成為管治團隊嘅一員,應該知道政府責任上要照顧買唔到樓嘅一群,令佢哋可以有瓦遮頭;但經濟上要睇住買咗樓嘅一群,因為佢哋萬一因樓價波動而輸咗副身家,對社會穩定先係最大打擊。1998年夾屋買家上街抗議,當時的電視畫面仍歷歷在目。
經濟循環樓價下跌,市民打死無怨;如果係政府做出蠢事而令樓價下跌,更怕事嘅市民都會被迫上街,你睇吓雷曼債券嘅苦主。樓價升到唔合理已經係事實,唯一解決方法係令樓價軟着陸,讓時間令唔合理嘅價錢變成合理,而唔係用手段將價錢拉落去變成合理。
貿易戰、加息、人民幣貶值,再加上市面累積了大量近期買了高價納米樓嘅市民,而家先嚟推低樓價是最攞命。
樓價怎樣才叫合理?《經濟學人》新刊登全球熱門城市樓價指數比較,香港一年樓價升幅唔夠德國柏林厲害,5年升幅連瑞典斯德哥爾摩都不如,比土地供應充足的紐西蘭奧克蘭還要低一截,咁點算做合理樓價?
全世界多人聚居嘅城市,樓價唔會平,香港係中國入面最宜居嘅城市,你點可能喺度買平樓?要遏抑樓價,只可用行政手段唔畀人買樓,但香港係自由市場唔會咁做,所以講任何樓價嘅主觀想法,都是白講。
訂戶登入
下一篇: | 加息就在眼前 |
上一篇: | 騰訊投資策略檢討重溫 |