2018年8月14日
土耳其遭到美國對付,被狂加關稅,貨幣里拉滙率大跌。不過,里拉滙率大跌對土耳其未必是壞事,土耳其貨品平咗,可以賣更多畀中國、俄羅斯,轉頭用結算貨幣買番中國、俄羅斯的進口貨,土耳其唔一定會受害。至於土耳其的外債,無論計美元還是計歐羅,都要還更多,隨時引致企業倒閉潮。
土耳其里拉大跌,物價飛漲,商人會囤積貨物,市面資源短缺。倘若滙價再跌,市場怕土耳其資產不斷貶值,便會紛紛拋售,搬離資金。最後結果,一個國家三大資產,房產、股票、貨幣全部下跌,債務違約,等候破產,繼而要賤賣國家資源還債,落入外人手中。經濟戰就係國土雖然完整,國產卻四崩五裂,被人淘空。
對付經濟戰,最有效係用政治手段。土耳其總統埃爾多安叫國民支持里拉,唔好走去兌換美元。可是,喺伊斯坦布爾嘅商人,全部都後悔自己換美金換得慢。財產攸關,唔會有人自願響應政府呼喚。有效做法當然係限制國民換美金,實行資本管制,咁先有效。土耳其政府已經嚴打網上媒體散播負面消息,視為經濟恐襲,一於全面唱好。
外資教路,建議土耳其加息10厘。如果跟佢哋提議加10厘,土耳其股市、樓市即時玩完,由外資大手掃平貨。
埃爾多安唔喜歡加息,下跌中嘅貨幣,唔加息,唯有唔畀人兌,唔畀攞出國,你睇吓2015年嘅人民幣,中國就成功阻止人民幣跌勢。土耳其搞唔掂,證明政府唔夠強勢。
中國同樣畀美國加徵關稅,會唔會學似土耳其咁坎坷?中國政府強勢,全民國家隊,人民幣具備有限度結算能力,但同美金比,還差得遠。中國金融市場封閉,資本不完全自由流動,股市跌係自己人推冧,唔係外資。只要樓市唔冧,中國金融市場是穩定的,因為美國人把財富存在股市,中國人把財富放在樓市。
外資無能力推冧樓市,但中國家庭負債沉重,7萬億美元,等於一半GDP,當中大部分是樓按。經濟戰會否推高中國失業率,從而令中國家庭債務違約?中央遏抑樓市,賣樓還債是否行得通?
歷史上嘅金融危機大部分都係債務危險,中國咁努力去槓桿,就係要減少債務危機風險。貿易戰令工廠遷移同倒閉,人民幣貶值令外債壓力沉重,用借貸嚟發展嘅廠商第一波全部要收縮或倒閉,連鎖反應從供應鏈一路擴散開去。貿易戰未必像推冧土耳其里拉一樣推冧人民幣,但絕對會減慢中國GDP增長。中國咁多人要開飯,經濟增長放緩、信貸收縮,對好多實力較差嘅人嚟講,已經係災難。
訂戶登入
下一篇: | A股後市波動 博反彈要等等 |
上一篇: | 「滬港通」及「深港通」上日收市統計 |