揭露私募基金業績包裝術

在復活節假期之前，高仁與「豬朋狗友」戴孤劃、程更計及中資投行「唉賓架」鍾國通在飯局中一起探討中資「唉賓」另一蠱惑招數，透過教唆民企老闆成立基金斂財的方法。

各位「巴打」，既然高仁邀請到熟悉中國國情的鍾國通出席飯局，戴Sir及阿程決定「打蛇隨棍上」繼續發問，先揭露內地PE Fund（私募基金或私募股權投資）的業績包裝術。

在披露對話實錄之前，請各位「巴打」重溫人物背景，簡介如下：

戴孤劃──又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東；

程更計──本地證券行經紀兼財務顧問，除了招呼散戶外，亦向上市公司出謀獻計；

鍾國通──中資投行「唉賓架」，熟悉中國國情。

戴孤劃：中資「唉賓」教民企老闆成立基金，又GP（General Partner，普通合夥人），又LP（Limited Partner，有限合夥人）。（忽然轉用普通話）其實，內地私募基金常常向我Pitching游說我做LP，他們展示的案例就好似北方佳麗般美艷動人，但是可信嗎？

程更計：最客觀直接評價應該係基金業績，睇IRR（歷史回報）相信冇錯啩。

高　仁：哈！哈！基金業績嘅簡單數字背後，可能隱藏咗許多包裝技巧，並唔係咁簡單嘅。（學戴Sir轉用普通話）老鍾，你說對不對？

鍾國通：當然沒錯。計算IRR其中一個重要參數係存續年數，只要基金運作時間愈短，IRR就愈容易被谷大。以一個運作一年嘅VC為例，基金中幾個項目進行下一輪融資，基金賬面估值隨時以倍數增加，令到IRR可能高達幾十巴仙，係咪好吸引呢？

高　仁：各位「巴打」仲要留意嘅係，有啲VC或者PE只會提供Gross IRR，而非扣減費用後嘅Net IRR，原因係佢哋可能處於成立初期，基金中嘅項目需要時間成長，項目增值基本抵消唔到基金費用開支，惟有出此下策囉。

戴孤劃：那怎樣辦？看歷史IRR行嗎？

程更計：係啦！我見好多老牌基金都鍾意用歷史IRR，去Show佢哋過去輝煌嘅成績喎。

高　仁：阿程，你都識得講過去啦，係「過去式」嚟嘞！佢哋歷史IRR之所以要咁高，大部分可能喺過去嘅黃金年代所產生，而近幾期嘅基金回報可能已經大不如前。

鍾國通：高仁講得好啱，尤其喺內地嘅急速變化環境，行業市場周期短，基金人員流動大，參考基金業績回報，都係短線啲好。

程更計：我仲有一樣嘢知道，LP投資一個基金所獲得嘅實際回報，並不等於基金嘅名義回報，原因係基金往往會保留部分現金作不時之需，呢啲現金係有機會成本嘛，所以要扣減返出嚟。公式如下：LP投資基金獲得的實際回報＝基金的名義回報－未利用現金的機會成本

戴孤劃：這些看來都是大學問啊！

高　仁：戴Sir，呢啲咪叫做基金業績包裝術囉！其實，投資基金做LP仲有其他要注意嘅地方，例如利益衝突咁。等我哋飲啖茶、食個包再過一陣先再講啦。

本欄逢周一刊出

如想與高仁交流上市公司的財技個案及招數，請電郵至 [email protected]

下一篇：	內地樓市出現泡沫還是熱潮?
上一篇：	馬來西亞──短期挑戰長期機遇

文章：