2018年5月8日
普京宣誓就任俄羅斯總統,如果佢順利完成任期,前後就做了24年總統或總理,長期統治。留意,佢係民選出嚟,證明民主與獨裁唔再係矛盾概念,而係相輔相成。唔使睇太遠,你睇返香港嘅情況,「一地兩檢」審議,你覺得民主選舉可以令場面得到改善?馬時亨講得最坦白,到最後都係數票,唔該你唔好阻住地球轉。一邊想條草案通過,另一邊唔想,其實冇乜辯論可言,大家各為其主,做足本分交差,下次選舉維持基本盤,咁又可以玩多4年。
另一份坦白,原來想坐高鐵去遠啲要落車再買票,即是高鐵只不過是快一點的直通車。我相信呢個唔會係永遠嘅情況,一條可以直落香港而唔可以直回內地嘅高鐵,唔符合國家利益。
高鐵同港珠澳大橋,策略任務係要將香港更深入融入內地,唔止係同深圳連接咁簡單。如果香港係大灣區嘅金融中心,咁未來嘅中環就唔再喺港島,而是喺西九。
所以,九龍站物業可以賣7萬蚊一呎,屯門外圍新盤賣西鐵站沿線,呎價一樣大賣,樓價繼續升到你唔信。而家最唔想樓價跌嘅,就係政府,因為萬一樓價跌,要出嚟執手尾就係班官。相信政府老早已經放棄遏抑樓價嘅主觀願望,反過來而家係期望樓價千祈唔好下跌。
超越自己能力買樓嘅一直受到懲罰,你見那些蝕讓盤就是缺乏實力嘅結果。萬一呢類缺乏實力嘅個案連環出現,唔使驚,因為至少佢哋還可以蝕讓出售。負資產最恐怖嘅,係肯蝕讓都冇人接。而家除咗一手納米樓以超高呎價同超高按揭成數不健康地出售,其餘真豪宅同二手樓都是落在有實力嘅用家手中。二手樓同豪宅無同購買力脫節,只係納米新盤先會透支一代人嘅購買力。
政府要做嘅,係千祈唔好推冧呢類樓價,否則受害嘅係真正小市民。例如連特首都話研究中嘅空置稅,千萬唔好逼發展商狂推貨尾納米樓出市場以避辣稅。一旦推冧了納米樓價,用盡身家入市嘅小市民係冇防守能力。
訂戶登入
下一篇: | 騰訊沒有夢想 |
上一篇: | 「滬港通」及「深港通」上日收市統計 |