吉利重演海航融資收購把戲

各位「巴打」相信都知道，近年來內地企業積極「走出去」，海航集團在海外大肆收購，其購物清單中的「戰利品」多不勝數，其中收購德意志銀行（Deutsche Bank）的交易是經典作之一。

高仁與「豬朋狗友」飯局時討論到，近期吉利汽車（00175）母公司吉利集團入股平治（Mercedes-Benz）母公司戴姆勒（Daimler AG）的交易，似乎是在重演海航融資收購的把戲。

在披露對話實錄之前，請各位「巴打」重溫人物背景，簡介如下：

戴孤劃──又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東；

施友化──擁有公司私有化經驗的前「唉賓」，被看中轉型為上市公司CFO。

規避德國權益披露要求

戴孤劃：（用普通話一口氣說出）中央政府於2000年提出「走出去」戰略，內地企業隨即積極響應到海外「血拼」，但海航集團瘋狂「買買買」引起監管部門關注，最近已轉變為「賣賣賣」的模式，之前連環出售3幅啟德地皮，真是令人不勝唏噓！

高　仁：海航近年規模之所以急速膨脹，有可能係空手入白刃嘅手法，透過槓桿融資進行海外併購。其中，海航增持德銀股權嘅交易，仲上演咗一場融資收購嘅把戲。

施友化：我都有聽聞過，海航增持德銀股權至近一成呢單刁，除咗利用內部現金支付之外，仲要動用超過26億歐羅嘅融資，當中瑞銀就俾咗海航21億歐羅去砌咗一個對沖工具，用嚟對沖德銀股價下跌時嘅潛在損失風險。

高　仁：簡單嚟講，呢個係一個相對較為便宜嘅融資方法，前提係目標公司嘅股票要夠流通、sizable，同埋要有synergy。最近，吉利汽車母公司吉利集團入股平治母公司戴姆勒，市傳都係用咗類似嘅方法去做，仲規避埋德國嘅權益披露嘅要求。

戴孤劃：（繼續用普通話）內地企業真是金融創新的先驅啊！

施友化：根據德國監管要求，一般上市公司股東增持逾3%同5%嘅門檻，就要作出披露。據聞，吉利控股入股戴姆勒成為最大股東，直至持股9.68%先作出披露。

高　仁：因為，收購方除咗買入目標公司嘅正股之外，同時沽出call option（認購期權），以及買入同一期限嘅put option（認沽期權），就成功規避披露上嘅監管要求。

高槓桿低利息再對沖

戴孤劃：（用普通話兼提高八度聲音說）內地企業買入海外公司的股票，當然是「既想當婊子，又要立牌坊」（高仁註：戴Sir又用國情特色用話）啦！高兄，你說怎麼辦？

高　仁：哈哈！戴Sir，我知道你想講乜。既要高槓桿，又要低利息，仲想要沖埋股價下跌，其實收購方利用「融資股權領口」（funded equity collar）去進行收購，就可以做到一箭多鵰嘅效果。而家講到口乾，不如飲啖茶、食個包，賣個關子，等一陣先再講。

（飯局未完，下周待續）

本欄逢周一刊出

如想與高仁交流上市公司的財技個案及招數，請電郵至[email protected]。

下一篇：	液化天然氣生產商應該參與開發市場
上一篇：	新興市場利好因素穩固

文章：