熱門:

2018年3月2日

方卓如 方如玉帥

今晚7點

今日是會計師公會EGM,群情較想像中洶湧。連平日好少聯絡嘅舊同學,都有發短訊出嚟叫人投票,可想而知今次係針拮到肉,大家覺得要走出嚟表態。

如果你係會計師,未有交出proxy,強烈建議你到一到場,感受吓百年難得一遇嘅踴躍氣氛,可以投完票就走,唔一定要坐到尾。今次三大議題,都係會員平時最多牢騷嘅事情,今次你唔出聲,相信以後都冇機會。錯失了這一次,如果事情發展不如你意,將來你只能自怨。

三大議題,字面上都寫到是沒有約束力,是會計師嘅智慧。好比會計師出身嘅司長,會用買回來的海洋公園門票,派畀學生作為與民分享嘅方法。既可以畀錢海洋公園賺,學生又覺得有得益,入場後消費,又幫海洋公園增加生意。港交所(00388)好多時都用一啲冇約束力嘅指引,增加上市公司管治水平。你唔一定跟,但唔跟就要解釋,英文叫comply or explain。而家會員投票叫理事會做事,你可以話冇約束力,但理事由會員選出,會員出聲,你唔跟,請解釋。如果理事做事可以唔理會員,下次點叫會員選你?

另一方面,就算有理事想推動改革,如果冇會員支持,亦好難撼動守舊因循嘅陣營分毫。表面上沒有約束力,骨子裏其實最有力。

會計師嘅司長,發揮了創意去實踐理財新哲學,例如加大科研支持,就用200億元搞河套區,讓人以為科技是從地底掘出來,可以用200億元在河套變出科技,忘記了科技其實無處不在,科技唔一定空降河套區;又例如推動電競活動,就係一億元將數碼港商場變身電競比賽場,高手自然橫空面世。

EGM議題,會計師一樣可以用創意實踐。將囤積過多嘅現金派發,可以通過減免3年會費,甚至派出CPD代用券,用來上堂搣飛。司長作為政府工都可以咁有創意,難道會計大行高層,日日都話能夠幫客戶出謀獻策諗計,竟然連少少派錢方法都諗唔到?以後點出嚟搵食,點取信於客戶,叫客戶畀錢找顧問費?

今晚7點正,胡忠27樓,只此一次,今生無悔。

(作者外遊,本欄暫停一周)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads