2017年12月18日
皇馬剛剛贏咗世冠盃,即係世界上最強嘅球會;但喺歐聯分組賽,熱刺又可以贏皇馬,即係熱刺仲強;不過兩日前,曼城可以贏熱刺4︰1,如入無人之境,熱刺恍如只有陪練份兒。
咁即係話,曼城現在應該係宇宙最強。記住,曼城全隊都冇超級球星,冇金球獎得主,連邊個係明日之星,未來球王都未知。咁實而不華嘅無敵之師,從未見過,如果唔係教練厲害的話,只有運氣好先能夠解釋。
上市規則終於有改變定案,夢寐以求嘅同股不同權即將來臨,大量中國嘅科技公司衝入香港。有同股不同權,又沒有集體訴訟權,compliance cost香港係全世界最低,只要你唔偷股東錢,股票唔向下炒,幾乎冇人會管你。而且蝕錢係冇罪,冇心戀戰生意淡薄先係死罪。中國嘅公司,賺錢可能頭痕,要做得大係本能。蝕得深又可以供股攞錢再做大啲,同股不同權之下唔怕自己唔跟供會失去上市公司,咁筍嘅生意模式真係宇宙最強。
中國嘅科技公司唔衝嚟香港上市,仲諗走去美國嘅,智慧高極有限。這就是香港市場股票運作嘅未來模式,你要學識點玩。
創業板未來慢慢枯死,完成歷史任務。創業板起源於科網年代,但死於今日科技主導經濟嘅年代,你話幾諷刺。創業板轉變到而家,真科技生意可以直上主板,中小型傳統生意唔夠數上創業板,未來唔會再有新血上GEM。現有嘅創業板公司會掀起逃亡潮,趕快在3年內轉主板,否則等除牌。創業板賣殼唔值錢,按殼冇人肯借錢,將來轉主板又要使多好多錢,咁仲有乜價值?賣咗創業板同轉咗板嘅老細,恭喜你,搭到尾班車。
Bitcoin升到2萬美元,而家買貨幣贏錢易過買股票,宇宙最強。就算你用零用錢買貨幣,贏錢仲多過你用副身家去買股票。記住,係泡沫,絕對係泡沫,但你成世人幾時試過活在沒有泡沫的世界?唔趁泡沫賺其一筆,你愧對呢個泡沫時代。
訂戶登入
下一篇: | 身體最誠實 |
上一篇: | 「滬港通」及「深港通」上周收市統計 |