熱門:

2017年7月13日

方卓如 方如玉帥

21世紀求生必備

電視訪問DSE狀元,全部都想做醫生,另類啲嘅都係想做牙醫。讀得書嘅蠢極有限,佢哋揀做醫生真係醒到爆。做得狀元最厲害嘅,唔係讀得書,係識考試。識考試同讀到書係兩回事,同有冇學識更加唔相干。識考試、有記性、唔怕捱夜、肯坐定定睇字,全部係狀元必備條件,更加係過渡成為專業人士嘅優良血統。

專業人士方面,最後被人工智能淘汰嘅,就係醫生。其他什麼律師會計師,都唔使未來,而家已經有眉目將會被人工智能取代。今年嘅狀元,到佢哋讀完大學,考完專業試,攞埋經驗,正正式式成為律師會計師之時,剛剛好趕及人工智能全面取締人類,即時畢業變失業。

專業人士同水喉技工冇分別

醫生比較特別,人類仍然想被人類醫治,懂得感同身受。醫生都會病,知道病人有乜感覺,唔似人工智能,任佢自我學習一億次,都唔會有一次懂得人類感受。所以狀元揀醫生呢條路,聰明,至少畢業後仲有條生路。

最識考試嘅做醫生,考唔到試嘅惟有做生意,兩者都有條生路。最慘嘅係考到與考唔到之間,走去讀經濟商科,讀完出嚟之後就唔知點算。而家嘅時勢,所謂讀到書其實係魔咒,令你局限自己要向讀書考試專業人士方向走,反而讀唔成書仲會有求生意志,不斷搵機會以免餓死街頭。專業人士以前係一級一級上,而家同一個水喉技工冇分別,都係一門手藝睇吓每日有冇得發市。用考試嚟做門檻嘅工種急速貶值,20年前CFA好值錢,20年後今日CFA都搵唔到工。

什麼才是21世紀求生必備?好似套印度片Dangal一樣,老豆掟個女落河自己游番上嚟,教佢哋摔交打到世界冠軍,叫佢哋自己諗計點應付對手。21世紀,人類要回復番原始本能,隨時會一無所有但又可以就地取材,由無到有。能夠快速應變環境先係21世紀基本技能,因為你今日學到嘅,10年之後又唔啱用,工種更加會每隔幾年又轉一次,冇一份工可以擔保你能夠做過世。能夠玩一樣喜好玩得夠精,你生存嘅本事比技能係識考試嘅高一籌。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads